Ապրիլի 8-ին Հրազդանի համայնքապետարանի և Հայաստանի թատերական գործիչների միության նախաձեռնությամբ Հրազդանի դրամատիկական թատրոնում մեկնարկել է հանրապետական երիտասարդական թատերական փառատոնը: Այն Հրազդանում առաջին անգամ է կազմակերպվում` Հրազդանը երիտասարդական մայրաքաղաք ճանաչվելու կապակցությամբ:
Բացման հանդիսավոր արարողությանը ներկա են եղել Հրազդան խոշորացված համայնքի ղեկավարի տեղակալ Վարուժան Սաֆարյանը, համայնքապետարանի աշխատակիցներ, թատերական գործիչներ, հյուրեր:
Փառատոնի բացումը մեկնարկել է Սոս Սարգսյանի անվան Համազգային պետական թատրոնը՝ «Եվ նորից գարուն» ներկայացմամբ, որի բեմադրիչը Նարինե Գրիգորյանն է:
Հայաստանի թատերական գործիչների միության նախագահ Հակոբ Ղազանչյանի խոսքով` նպատակ են ունեցել թատրոնը տանել մարզեր, և այդ ծրագիրն իրեն արդարացրել է:
Կարդացեք նաև
«Երկար դադարից հետո մենք կրկին վերականգնում ենք մեր ծրագիրը: Ես շատ ուրախ եմ, որ Հրազդան համայնքի ղեկավար Սևակ Միքայելյանն անմիջապես արձագանքել է մեր առաջարկին: Եվ քանի որ Հրազդանը հռչակվել է երիտասարդական մայրաքաղաք, որոշել ենք երիտասարդական թատերական փառատոն կազմակերպել հենց Հրազդանում՝ երիտասարդ բեմադրիչների և դերասանների մասնակցությամբ:
Ի ուրախություն մեզ՝ հրաշալի ծրագիր է կազմվել, և մեր լավագույն թատրոններն իրենց լավագույն ներկայացումներով հանդես են գալու ծրագրի շրջանակներում:
Հավելեմ, որ այդպիսի մակարդակի ծրագիր երբևէ որևէ մարզում չի իրականացվել»,- մեզ հետ զրույցում ասել է նա:
Սոս Սարգսյանի անվան համազգային թատրոնի գեղարվեստական ղեկավար, ՀՀ վաստակավոր արտիստ Նարինե Գրիգորյանը մեզ հետ զրույցում նշեց, որ իր համար մեծ պատիվ է բացել փառատոնը, այն էլ` Հրազդան քաղաքում:
«Ես փոքր տարիքում թատերական խմբակ էի հաճախում Հրազդանում: Այդ ժամանակ թատրոնի շենքն անբարեկարգ էր և ցրտի պատճառով կարգին չէր գործում: Դեռ մանկուց երազել եմ այդ բեմում հայտնվել, և վերջապես իմ բեմադրությամբ՝ «Եվ նորից գարուն» ներկայացումով բացել ենք փառատոնը: Փորձել եմ իմ հոգու երջանկության գարնանային խորհուրդն փոխանցել հանդիսատեսին:
Եվ քանի որ Հրազդանում գարունը ուշ է գալիս, ճիշտ ժամանակն է գարունը դիմավորելու», -ասել է Նարինե Գրիգորյանը:
Երևանի Հովհաննես Թումանյանի անվան պետական տիկնիկային թատրոնի գեղարվեստական ղեկավար Ռուբեն Բաբայանի խոսքով` փառատոնի տասը թատերական օրերն իսկապես երևույթ են դառնալու մեր իրականության մեջ:
Իսկ դրամատուրգ, «Գրական թերթի» գլխավոր խմբագիր Կարինե Խոդիկյանն իր հերթին շնորհակալություն է հայտնել Հրազդանի համայնքապետարանին և նշել, որ փառատոնը ոչ միայն թատերական, այլև մշակութային կյանքն աշխուժացնելու լավագույն գրավականն է:
Նշենք, որ Հրազդանի հանրապետական երիտասարդական թատերական փառատոնը կշարունակվի մինչև ապրիլի 16-ը:
Վովա ԱՐԶՈՒՄԱՆՅԱՆ
Լուսանկարների մի մասը տրամադրել է Հրազդանի համայնքապետարանը
