«Արցախի եւ ՀՀ-ի դեմ լայնածավալ գործողություններ չեն լինի՝ ոչ միայն այն պատճառով, որ դա թույլ չի տա արեւմուտքը կամ Ռուսաստանը, կամ որ մեր զինված ուժերն ամեն դեպքում ի վիճակի են դա կանխել, այլեւ այն պատճառով, որ իմաստ չկա Ադրբեջանի համար։ Ինչո՞ւ հիմա լայնածավալ ռազմական գործողություններ սկսի Արցախում եւ իր համար լուրջ խնդիրներ ստեղծի, եթե հստակ քաղաքականությամբ ունի ճնշումներ գործադրելու ռազմավարություն»,-«Հոդված 3» մամուլի ակումբում առցանց քննարկման ժամանակ այսօր անդրադառնալով Ադրբեջանի կողմից ռազմական գործողությունների հավանականությանը՝ ասաց քաղաքագետ Բենիամին Պողոսյանը։
«Իսկ ՀՀ-ի դեմ հասկանալի չէ, թե ինչու պետք է ռազմական գործողություններ սկսի։ Ամեն դեպքում, ՀՀ-ն միջազգային իրավունքի սուբյեկտ է։ Դրանով Ադրբեջանն ինչի՞ է հասնելու։ Հասկանալի չէ»,-հավելեց Բենիամին Պողոսյանը։ Նրա խոսքով՝ առաջիկայում կարճ ժամանակում պետք չի սպասել ոչ խաղաղության պայմանագրի, ոչ էլ սահմանագծման, ոչ էլ որեւէ մեկը ճանաչելու է Արցախի անկախությունը․ «Իսկ Ադրբեջանին ոչ մեկ չի ստիպելու զորքերը հեռացնել նախկին ԼՂԻՄ տարածքներից։ Ադրբեջանը շարունակելու է իր գործելաոճը, իսկ մենք ի՞նչ ենք անելու՝ այս ամենին հակազդելու համար»։
Քաղաքագետ Տիգրան Գրիգորյանն էլ իր հերթին ասաց՝ համաձայն է, որ լայնածավալ ռազմական գործողություններ չեն լինի, սակայն տեղային գործողություններն Ադրբեջանի կողմից բացառված չեն․ «Փառուխի օրինակի մոդելի պես մտնում են գյուղ կամ ուզում գրավել ռազմավարական բարձունք։ Ունեն նախանշած բարձունքներ ու գյուղեր, որոնք վերահսկելն առաջիկա տարիներին լինելու է իրենց համար առաջնահերթություն։ Սա արդեն իսկ անվտանգային լրջագույն ճգնաժամ է առաջացրել Արցախում»։
Կարդացեք նաև
Լուիզա ՍՈՒՔԻԱՍՅԱՆ
