Այսօր ԱԺ տնտեսական հարցերի հանձնաժողովը քննարկում էր կազմակերպել հանրային սննդի փակ եւ բաց վայրերում ծխախոտի եւ ծխախոտային արտադրանքի, փոխարինիչների օգտագործման արգելքի մասին աղմկահարույց օրենքի շուրջ: Հիշեցնենք, որ մարտի 15-ից օրենքի այդ դրույթը մտել է ուժի մեջ ու արդեն խնդիրներ են նկատվում՝ կիրառման հետ կապված:
Փաբերից մեկի հիմնադիր Մանուկ Սուքիասյանն ասաց, որ ոլորտն ունի 20-25% անկում ու կարող է ոլորտը տանել լիկվիդացիայի. «Փաբերում ընդունված է ծխել, խմել, պարել, սնունդը 20% է, ով չի ուզում այդ օդը շնչել՝ կարող է չգալ»: Ըստ նրա, պետք է հանրային սննդի ենթատեսակներ սահմանել:
Անի Իսպիրյան
Էկոնոմիկայի փոխնախարար Անի Իսպիրյանն ասաց, որ դրական կարծիքներ են լսում, մարդիկ գալիս են, շնորհակալություն են հայտնում, որովհետեւ իրենց մոտ նոր հաճախորդներ են ավելացել:
Քննարկմանը ներկա տնտեսվարողները բարկացան. «Կներեք էլի, չգիտենք ով ումից է շնորհակալություն հայտնում, մենք չունենք շնորհակալություն հայտնելու, որովհետեւ մեր շրջանառությունը նվազել է: Ես էլ չեմ ծխում ու շատ գոհ եմ, որ փակ տարածքում ծխած չի, բայց իմ բիզնեսը տուժում է, որովհետեւ գտնվում է մի վայրում, որտեղ դու պետք է դուրս գաս շենքից, կտրես 150 մետր, որ կարողանաս ծխել: Ինչո՞ւ է այս օրենքով փոխարինիչներն էլ արգելվում, եթե չունեն ծուխ ու երկրորդային վնաս»:
Կարդացեք նաև
Բաբկեն Պիպոյան
«Իրազեկ եւ պաշտպանված սպառող» ՀԿ նախագահ Բաբկեն Պիպոյանն ասաց, որ եթե երկու հոգով գնում են ռեստորան ու մեկը ծխող չի, գնալու են այն ռեստորան, որտեղ ծխողը կարողանալու է ծխել. «Առանձին տուրք սահմանենք քմ-ով, որ այս հատվածները, որտեղ կարող են ծխել, թանկ լինի, այդ տուրքը ի վերջո ապրանքի արժեքի մեջ է մտնելու, տեսնենք քանի՞ անգամ են պատրաստ ծխողի հետ գնալ այդ ռեստորան»:
Փոխնախարարն ասաց, թե օրենքները չպետք է փոփոխվեն շաբաթը մեկ, օտարերկրյա ներդրողներին պետք է կանխատեսելիություն ապահովենք. «Այս օրենքի նախագիծը չի եղել էկոնոմիկայի նախարարությանը, միեւնույն ժամանակ մենք արդեն տեսնում ենք այս օրենքի դրական ազդեցությունը»:
Տնտեսվարողները հակադարձեցին. «Ի՞նչ դրական ազդեցության մասին է խոսքը: Օրենքով տեսեք ինչ է եղել՝ օդանավակայանում 6 տնտեսվարողից վերցվել է ծխախոտ վաճառելու իրավունքը, տրվել է մեկ տնտեսվարողի: Ինչո՞վ է օդանավակայանի փոքր խանութը տարբերվում «Երեւան սիթի»-ից, ՍԱՍ»-ից, «Պարմա»-ից, կամ մեր շենքի տակի Գեւորիկի բուդկից, որոնց կարելի է թեկուզ փակ վիճակում ծխախոտ վաճառել, մեզ չի կարելի: Մենք տարեկան կորցնում ենք մոտ 350-400 մլն-ի շրջանառություն, այդքան հարկ չի մտնում բյուջե, դրա դրական կողմը կարո՞ղ եք բացատրել որն է: Այսպես թե այնպես չեն ծխում, օդանավակայանից առեւտուր են անում հիմնականում տուրիստները, որոնք երկրից դուրս են գնում ու մեր համար մեկ է՝ իրենք կծխեն, թե չեն ծխի»:
ՔՊ պատգամավոր Բաբկեն Թունյանն ասաց, որ փակ տարածքների մասով թեման փակ է, մյուս քննադատությունների հետ կապված կարելի է քննարկել, բայց պետք է նկատի ունենալ՝ երբ տնտեսական կողմին են ուշադրություն դարձնում, առողջապահական հարցերն են անուշադրության մատնվում:
Հռիփսիմե ՋԵԲԵՋՅԱՆ
