«Լույս» հիմնադրամն անդրադառնում է ս.թ. ապրիլի 6-ին Բրյուսելում տեղի ունեցած Փաշինյան-Ալիև հանդիպման ավարտին Եվրոպական Խորհրդի նախագահ Շառլ Միշելի տարածած հայտարարության խնդրահարույց կետերին և նախօրեին կառավարության նիստի ժամանակ Փաշինյանի ելույթի ու Շառլ Միշելի տարածած հայտարարության տեքստի միջև առկա հակասություններին։
🔹 Տարածած հայտարարության տեքստում որևէ կերպ արտացոլված չէ Փաշինյանի ԼՂ ժողովրդի անվտանգության երաշխիքների, կարգավիճակի և իրավունքների հարցի բանակցությունների առարկա դառնալու պնդումը։ Ադրբեջանը բազմիցս պաշտոնապես նշել է, որ պատրաստ է խաղաղության բանակցություններ սկսել իր կողմից առաջ քաշած սկզբունքների՝ այդ թվում տարածքային ամբողջականության ճանաչման սկզբունքի հիման վրա և այդ հարցը ներկայացրել է որպես նախապայման։ Բանակցային գործընթաց սկսելու որոշման առկայությունը, ենթադրում է, որ հայկական կողմն ընդունել է այդ նախապայմանը (ինչը հաստատում է նաև Փաշինյանը)։ Փոխարենը, հայկական կողմն առաջ է քաշել որոշ այլ սկզբունքներ, որոնց վերաբերյալ հստակ և պաշտոնական ձևակերպումներ այդպես էլ չեն հրապարակվել, Ադրբեջանը չի հայտարարել այդ սկզբունքներն ընդունելու մասին, դրանց մասին խոսք չկա նաև ԵԽ նախագահի հայտարարության տեքստում։ Սա մեկնարկած այս գործընթացում Ադրբեջանին ի սկզբանե բանակցային առավելություն է տալիս։ Իր իսկ կողմից հայտարարված և ՀՀ վարչապետի կողմից ընդունված սկզբունքներից ցանկացած շեղում այս դեպքում Ադրբեջանին առիթ կտա այն մեկնաբանել որպես ՀՀ կողմից բանակցային գործընթացը խաթարելու և նախապես ընդունված սկզբունքները խախտելու փորձ և դիմել նորանոր սադրանքների։
🔹 Չնայած Փաշինյանի պնդումներին՝ ԵԱՀԿ ՄԽ համանախագահությունը դուրս է մղվել բանակցային գործընթացից։ Վերջին համատեղ հայտարարությունը վերջիններս արել են դեռ նախորդ տարվա դեկտեմբերին, ՀՀ և Ադրբեջանի ղեկավարների միջև 44-օրյա պատերազմից հետո բոլոր հանդիպումները տեղի են ունեցել ԵԱՀԿ ՄԽ ձևաչափից զատ, իսկ ապրիլի 6-ի հանդիպումը առհասարակ որևէ առնչություն չունի ԵԱՀԿ ՄԽ հետ, քանի որ ԵՄ-ն չի համարվում համանախագահող կողմ։ Միշելի տարածած հայտարարության տեքստում ԵԱՀԿ ՄԽ-ի և Լեռնային Ղարաբաղի մասին հիշատակման առհասարակ բացակայությունը վկայում է, որ վարչապետի հայտարարությունները, գործողություններն ու ընթացող գործընթացները միմյանց հակասում են։ Ակնհայտ է, որ Ադրբեջանը մեծ ջանքեր է գործադրել, որ ԼՂ կամ Ղարաբաղ տերմինը հայտարարության տեքստից առհասարակ բացակայի, իսկ հայկական կողմը չի կարողացել դրան խոչընդոտել։
🔹 ԵԽ նախագահի հայտարարության մեջ ոչինչ չկա Փառուխի դեպքերի մասին՝ չնայած վարչապետը նշում է հանդիպման ժամանակ այդ հարցի շուրջ քննարկման մասին։ Հայտարարության մեջ առկա է հիշատակվում «վերջին լարվածության» մասին, սակայն նույնիսկ չի նշվում, որ դա տեղի է ունեցել Լեռնային Ղարաբաղում։
Կարդացեք նաև
🔹 Ոչինչ նշված չէ ՀՀ տարածքից ադրբեջանական զինուժի դուրսբերման մասին, մինչդեռ Սև Լճի դեպքերից հետո ՀՀ իշխանությունները դա ներկայացնում էին, որպես սահմանագծման գործընթացի մեկնարկի նախապայման։
«Լույս» տեղեկատվական հարթակ
