«Դատավոր Արտուշ Գաբրիելյանը 2021-ի ապրիլի 30-ի որոշմամբ թույլ է տվել քրեական դատավարության օրենսգրքի 135-րդ հոդվածի 1-ին, 2-րդ մասերում ամրագրված պահանջների խախտում»,- հայտարարեց ՀՀ արդարադատության նախարարի խորհրդական Գագիկ Հարությունյանը՝ Բարձրագույն դատական խորհրդում (ԲԴԽ) ներկայացնելով ՀՀ արդարադատության նախարարի՝ Երևանի ընդհանուր իրավասության դատարանի դատավոր Արտուշ Գաբրիելյանին կարգապահական պատասխանատվության ենթարկելու վերաբերյալ միջնորդությունը:
Գագիկ Հարությունյանը մանրամասնեց. «Քննության առնելով մեղադրյալի կալանավորումը՝ որպես խափանման միջոց կիրառելու մասին միջնորդությունը՝ դատավորը որոշել է մերժել այն՝ վերջինիս՝ հանցագործություն կատարած լինելու հիմնավոր կասկածի բացակայության պատճառով, սխալ է մեկնաբանել քրեական օրենսգրքի 177-րդ հոդվածը. մեկնաբանել է մինչև 2019-ի դեկտեմբերի 14-ը եղած խմբագրությամբ: Ուստի հանգել է ոչ իրավաչափ եզրահանգման, արդյունքում չի քննել կալանավորման հիմքերի առկայության հարցը»:
Գագիկ Հարությունյանի պնդմամբ՝ եթե դատավորն առաջնորդվեր քրեական օրենսգրքի գործող խմբագրությամբ և մեղադրյալի խափանման միջոցի հարցը քններ, ապա չէր կարող չառաջանալ դրա անհրաժեշտությունը: Դատավորի կողմից դատավարական իրավական նորմի խախտումը կատարվել է մեղավորությամբ, որը դրսևորվել է դիտավորությամբ, ուստի ղեկավարվելով համապատասխան իրավադրույթներով՝ նախարարը որոշել է նման միջնորդություն ներկայացնել»:
ԲԴԽ անդամները հետաքրքրվեցին՝ կարծում են դատավորը դիտավորությա՞մբ է նման որոշում կայացրել, Գագիկ Հարությունյանը պատասխանեց. «Դիտավորությունը պայմանավորում ենք հոդվածի ձևակերպման ակնհայտությամբ»:
Կարդացեք նաև
ԲԴԽ անդամները նաև հարցրին՝ եթե դատավորը օրենքը նոր խմբագրությամբ մեկնաբաներ, նման որոշում կկայացնե՞ր, Գագիկ Հարությունյանն այս առիթով ասաց. «Դատավորի որոշման վրա ազդել է գործող օրենսդրությունը չկիրառելը, չմեկնաբանելը այնպես, ինչպես պետք էր»:
Տաթև ՀԱՐՈՒԹՅՈՒՆՅԱՆ
