«Չեմ կարող ասել, թե ինչ նկատի ուներ։ Կարող եմ երաշխավորել, որ կառավարությունը կոնկրետ տնտեսվարողի կամ կազմակերպության շահեր չի կարող սպասարկել»,-խորհրդարանում լրագրողների հետ ճեպազրույցում այսօր ասաց ՀՀ տարածքային կառավարման եւ ենթակառուցվածքների նախարարի տեղակալ Հովհաննես Հարությունյանը՝ անդրադառնալով «Հայաստան» խմբակցության պատգամավոր Վահե Հակոբյանի հայտարարությանը, թե ընդերքի մասին օրենսգրքում փոփոխությունների նախագիծը միտված է մեկ տնտեսվարողի շահերն ապահովագրելուն։
«Սա ուղղված է բոլոր բարեխիղճ կազմակերպություններին եւ ներդրողներին, որոնք իրենց պարտականությունները ճիշտ են կատարում, հանքարդյունաբերությունն իրականացնում օրենքին եւ նորմերին համապատասխան»,-վստահեցրեց փոխնախարարը։
Հովհաննես Հարությունյանը դժվարացավ ասել, թե այս փոփոխության արդյունքում որքան ներդրում են ակնկալում, բայց նշեց, որ օրենսդրական դաշտի բարելավումը բերում է ներդրումների աճի։ Նաեւ հայտնեց, որ հանքարդյունաբերության ոլորտի ռազմավարություն են մշակում։
Հիշեցնենք, որ «Ընդերքի մասին» օրենսգիրքը լրացվել է նոր հոդվածով, որը նախատեսում է ընդերքօգտագործման իրավունքի ժամկետի երկարաձգում անհաղթահարելի ուժի հիմքով․ այդպիսիք են համարվում հրդեհները, ջրհեղեղները, երկրաշարժերը, փոթորիկները կամ այլ բնական աղետները, ինչպես նաև պայթյունները, պատերազմը, ահաբեկչությունը, քաղաքացիական պատերազմը, քաղաքացիական զանգվածային անհնազանդությունը, որոնք ընդերքօգտագործողը չէր կարող կանխատեսել, կանխարգելել եւ որոնց հետեւանքով ընդերքօգտագործողը չի կատարել կամ անպատշաճ է կատարել սույն օրենսգրքով եւ ընդերքօգտագործման իրավունքով սահմանված պարտավորությունները:
Կարդացեք նաև
Լուիզա ՍՈՒՔԻԱՍՅԱՆ
