«Շուշիի, Հադրութի, Քարինտակի, Մարտունու, Ասկերանի գյուղերի իմ քույրերի եւ եղբայրների հետ ուզում եմ զրուցել՝ բոլոր նրանց, ում աչքերի մեջ նայելիս իշխանությունը ստում է, չի համարձակվում ասել, որ հայրենիքն օկուպացված է»,-խորհրդարանական ընդդիմության՝ Ազատության հրապարակում այսօր հրավիրած հանրահավաքի ժամանակ հայտարարեց ԱԺ «Պատիվ ունեմ» խմբակցության պատգամավոր Հայկ Մամիջանյանը։
«Վախենում են օկուպանտից՝ սխալվում են․ պետք է վախենալ նրանցից, ովքեր 2 ու դեռ շատ անգամներ ծնկի են բերելու օկուպանտներին։ Շուշիի մայր տաճարի կամարների տակ աղոթած ու Հադրութում գերեզման թողած հայրենակիցներիցս պետք է վախենան։ Հերոս-զավակների պահած հողը կտոր-կտոր ծախում են։ Իրենց բերած կեղծ խաղաղությունից արյան հոտ է գալիս։ Ծախում են դեմքի այնպիսի արտահայտությամբ, կարծես թե բոլորիս փրկություն են բերել, մի բան էլ մեր վրա են մուննաթ գալիս»,-հավելեց նա։
Մամիջանյանի խոսքով՝ պայքարից հիասթափված մարդիկ միաժամանակ հասկանում են, որ Արցախի հարցի լուծման բանալին ոչ Վաշինգթոնում է, ոչ Բրյուսելում, ոչ Մոսկվայում, այլ Երեւանում․ «Մեր ընկերները հոգնել են անհաջողությունից։ Մեզ դժվար են հավատում։ Կներեք, բայց դուք ինքներդ ձեզ պիտի հավատաք։ Գուցե ընդդիմությունը շատ սխալներ ունի, բայց ճանապարհից հետ կանգնելու տարբերակ չկա։ Հայրենիքի համար պայքարելիս ճամփի կեսից հետ չեն կանգնում»։
Կարդացեք նաև
Պատգամավորը դիմեց նաեւ երկրից ճարահատյալ արտագաղթողներին․ «Դուք հասկանում եք, որ Փաշինյանը ձեռ է տալիս բոլորին, բացի հայերիցս։ Հասկանում եք, բայց չեք հավատում, թե ինչ հզոր ուժ ենք մենք։ Համ էլ, մեր խայտառակությունից ո՞ւր պիտի փախնենք։ Ձեր տանը որ «տառական» ու «կռիս» են հայտնվում, տնից փախնո՞ւմ եք։ Չէ՜՝ քշում եք դրանց»։
Հայկ Մամիջանյանը դիմեց նաեւ նրանց, ովքեր 2018թ․-ին ասում էին «Արցախը տանք՝ հանգիստ ապրենք», ովքեր ուրախացան «սեփական կետից» բանակցություններ սկսողից․ «Ասում էր, թե առանց Արցախի բանակցային սեղանին չի նստի։ Չորս տարի անցավ․ ոչ միայն Արցախը բանակցային սեղանին չի, այլեւ Հայաստանը։ Առանց մեզ որոշում են մեր ապագան»։
Լուիզա ՍՈՒՔԻԱՍՅԱՆ
