Վանաձորի Բազում թաղամասի Չերկասի 2-րդ շենքի բնակիչներն անհանգստացած են, նրանք լուրջ խնդրի առջեւ են կանգնել: Արդեն մի քանի ամիս է ինչ թաղամասի կոյուղաջրերը լցվում են շենքի նկուղներ, խարխլելով ու վթարային դարձնելով շենքի հիմքը:
Բնակիչներն ասում են, որ բազմաթիվ անգամներ են դիմել պատկան մարմիններին, սակայն խնդիրն այդպես էլ մնացել է դեռեւս չլուծված. «Շատ-շատ անգամ ենք դիմել, բողոքել ենք, բայց ոչ մեկը չի արձագանքել: Նույնիսկ Երեւանի իրենց կենտրոնից ահազանգում են այստեղ, բայց ոչ մի բան չեն անում: Էսքան քար անտարբերություն ժողովրդի նկատմամբ, ժողովրդի կյանքի ու ճակատագրի նկատմամբ՝ սա աններելի է: Նկուղներ պետք է նավակով մտնես: Շենքը քանդվելու է»:
Շենքի 80-ամյա բնակիչ Գարեգին Նիկողոսյանն ինքն էլ առանձին է իր բողոքը ներկայացրել, սակայն պատասխանը միայն թղթի վրա է մնացել. «Նոյեմբերի 29-ին դեպքը կատարվել է, ես իրենց դիմել եմ, պատասխանը եկել է, որ եղանակների լավանալու դեպքում անպայման մենք կհանդիպենք: Բայց նոյեմբերն անցավ, դեկտեմբերն անցավ ու մինչեւ այսօր: Էս ո՞ւր ենք գնում»:
Խնդիրն անհանգստացնում է հատկապես առաջին հարկի բնակիչներին: Կոյուղաջրերի հետեւանքով ոչ միայն շենքի հիմքն է թուլանում, այլեւ գարշահոտությունն ու խոնավ պատերն իրենց ազդեցությունն են ունենում բնակիչների առողջական վիճակի վրա. «Հնարավոր չի ապրել, չեմ իմանում, թե ոնց կարելի է այս իրավիճակից դուրս գալ, արդեն 2 ամսից ավելի է՝ էս հոտի մեջ ապրում ենք: Ես չգիտեմ՝ գնամ ում բարեկամի տանը մնամ, արդեն էլ հնարավոր չի: Էս ցրտից, հոտից ու սառնությունից հիվանդացել եմ արդեն: Շատ-շատ տեղեր եմ դիմել, բայց մինչեւ հիմա փոփոխություն չկա»:
Կարդացեք նաև
Առաջիկայում խնդրի վերաբերյալ Aravot.am-ը կզրուցի համապատասխան մարմինների հետ եւ կներկայացնի վերջիններիս պարզաբանումը ստեղծված իրավիճակի մասին:
Տաթեւիկ ՂԱԶԱՐՅԱՆ
