Հայաստանի Հանրապետությունում Լեհաստանի Հանրապետության արտակարգ և լիազոր դեսպան Պավել Չեպլակը Մամուլի ազգային ակումբում կայացած ասուլիսում անդրադառնալով ԵԱՀԿ գործող նախագահ, Լեհաստանի արտաքին գործերի նախարար Զբիգնեւ Ռաուի հայաստանյան այցին` նշեց. «Լեհաստանի արտաքին գործերի նախարար, ԵԱՀԿ գործող նախագահ Զբիգնեւ Ռաուն այց կատարեց Վրաստան, Ադրբեջան եւ Հայաստան: Սա վկայում է այն մասին, թե ինչ մեծ կարեւորություն է տալիս Լեհաստանը Հարավային Կովկասի երկրների հետ համագործակցության ոլորտին: Ծրագիրը բոլոր երեք երկրներում նույնն է եղել: Հայաստանում հանդիպումներ են կայացել ՀՀ նախագահի, վարչապետի եւ արտգործնախարարի հետ»:
Հայաստանում Լեհաստանի դեսպանը յուրահատուկ որակեց Արցախի մարդու իրավունքների պաշտպան Գեղամ Ստեփանյանի հետ հանդիպումը: «Գլխավոր նպատակն է եղել ըմբռնել Հայաստանի դիրքորոշումը՝ կապված ԼՂՀ հակամարտության եւ անվտանգության հարցերի հետ: Նախարար Ռաուն փոխանցել է մեր կարծիքներն ու առաջարկները, որոնք դիտարկվելու են Հայաստանի կառավարության կողմից մոտակա օրերին»,-ասաց պարոն Չեպլակը:
Կարեւորելով Լեհաստանի արտաքին գործերի նախարարի այցը Հայաստան` դեսպանն ընդգծեց, որ նման բարձր մակարդակի այց վերջին անգամ կայացել էր 2017թ աշնանը: Հավելեց, որ փոխայց կատարելու հրավեր է ստացել ՀՀ արտգործնախարար Արարատ Միրզոյանը: Նաեւ տեղեկացրեց, որ բոլոր հանդիպումներին մասնակցել է ԵԱՀԿ նախագահի անձնական ներկայացուցիչ Անջեյ Կասպրշիկը:
Կարդացեք նաև
«Ինչ վերաբերվում է Լեհաստանի եւ Հայաստանի միջեւ երկկողմ հարաբերություններին, հույս ունենք, որ քովիդի համաճարակի նվազեցման հետեւանքով կկարողանանք հաճախացնել փոխայցերը: Գոհունակություն ենք հայտնում նաեւ Հայաստան-ԵՄ հարաբերությունների եւ Հարավային Կովկասի հարցերով ԵՄ հատուկ ներկայացուցիչ Տոյվո Կլաարի այցի առումով»,- շեշտեց Պավել Չեպլակը:
Գոհար ՀԱԿՈԲՅԱՆ
