ԱԺ-ն այսօր արտահերթ նիստ է գումարել՝ օրակարգում ՏԻՄ մարմիններին առնչվող նախագիծը, որով դրա հեղինակ իշխանական պատգամավորներն առաջարկում են՝ վարչապետը պետք է ժամանակավոր պաշտոնակատարներ նշանակի այն համայնքներում, որտեղ համայնքապետեր չեն ընտրվել։ Նախագծի համահեղինակ, «Քաղաքացիական պայմանագիր» խմբակցության պատգամավոր Վահագն Հովակիմյանը հայտարարեց, որ խնդիրն այս պահին վերաբերում է կոնկրետ Վանաձորին։
Վահագն Հովակիմյան
«Դատարանն արգելել է նիստը գումարել, մինչեւ վերջնական դատական ակտը լինի՝ մինչեւ հուլիս։ Համայնքի ղեկավար ընտրվելու հարցով ավագանու նիստը չի կայանում։ Նորընտիր ավագանին իր կամքից անկախ՝ չի կարող նիստ գումարել, որովհետեւ դա պայմանավորված է դատական ակտով։ Համայնքի բնականոն գործունեությունը խաթարված է»,-ասաց նա։
Հիշեցնենք, որ Վանաձորում առավելագույն քվեներ ստացած թեկնածու Մամիկոն Ասլանյանը կալանավորված է։
Նախագծի հեղինակներից ՔՊ խմբակցության պատգամավոր Արփի Դավոյանն էլ ասաց, որ քաղաքի կառավարման խնդիր կա, եւ նախագիծը մի բան էլ դեռ ուշացած է․ «Արամ Վարդեւանյանը շահարկում է, թե մենք ուզում ենք ՏԻՄ-երը զավթել։ Հասկանում եմ, որ ձեր ողջ խոսույթի մեջ ընկած է ձեր անցյալի փորձը։ Այստեղ ոչ Մամիկոն Ասլանյանի հարցն է շոշափվել, ոչ էլ․․․Վանաձոր քաղաքի հարցն է քննարկվում, որը հետո էլ կարող է ծագել խոշորացման արդյունքում»։
Կարդացեք նաև
ԱԺ պետաիրավական հարցերի հանձնաժողովի նախագահ, ՔՊ խմբակցության պատգամավոր Վլադիմիր Վարդանյանն էլ վստահեցրեց, որ որեւէ մեկը մյուսից իշխանություն չի զավթում․ «Սա լուծում է, որն ապահովելու է սահուն անցում մեծամասնականից դեպի համամասնական։ Սա չի լինի այն դեպքում, երբ կունենանք խոշորացված եւ համամասնական կարգով ձեւավորված համայնքներ։ Իշխանական վակուումը հանդուրժել մեծությամբ երրորդ քաղաքում չի կարելի։ Սա կարող է վերաբերել այն դեպքերին, երբ նոր ՏԻՄ մարմինները չեն հասցրել ձեւավորվել։ Եվ խոսքը միայն ժամանակավոր պաշտոնակատարի մասին է»։
Հավելենք, որ նախագիծն ընդունվեց առաջին ընթերցմամբ։
Ընդդիմությունը չմասնակցեց քվեարկությանը՝ գտնելով, որ սա ՏԻՄ կառավարումն իշխանության կողմից զավթելու նպատակ ունի։
Լուիզա ՍՈՒՔԻԱՍՅԱՆ
