«Հայաստանն ուզում են զավթել, եւ կառավարության նիստում այդ մասին հայտարարվեց։ Ուզում է զավթել Ադրբեջանը՝ հարձակվելով ՀՀ-ի եւ Արցախի վրա։ Այսօր այստեղ ներկայացվում է նախագիծ, որը կրկին զավթելու մասին է, բայց այս անգամ՝ արդեն ներսից»,-ԱԺ արտահերթ նիստում այսօր հայտարարեց «Հայաստան» խմբակցության պատգամավոր Անդրանիկ Թեւանյանը։
ԱԺ-ն այսօր արտահերթ նիստ է գումարել՝ օրակարգում ՏԻՄ մարմիններին առնչվող նախագծով, որով դրա հեղինակ իշխանական պատգամավորներն առաջարկում են՝ վարչապետը պետք է ժամանակավոր պաշտոնակատարներ նշանակի այն համայնքներում, որտեղ համայնքապետեր չեն ընտրվել։ Հիշեցնենք, որ Վանաձորում առավելագույն քվեներ ստացած թեկնածու Մամիկոն Ասլանյանը կալանավորված է։
Անդրանիկ Թեւանյանի խոսքով․ «Փորձ է արվում ՏԻՄ հասկացությունը վերացնել, այն դարձնել նշանակովի։ Եթե մինչեւ վերջ անկեղծ ու ազնիվ լինեին հեղինակները, ապա նախագիծը պետք է վերնագրեին Մամիկոն Ասլանյանին կամ վանաձորցիներին քվեի իրավունքից զրկելու նախագիծ։ Այս եւ մյուս զավթումները խոսում են այն մասին, որ ՀՀ-ն իսկապես զավթվելու վտանգի տակ է։ Սա այն դեպքում, երբ իշխանությունը խոսում է ժողովրդի քվեի, բաց, թափանցիկ գործելաոճի մասին։ Զավթողականությանը պետք է վերջ տրվի դրսից ու ներսից»։
ԱԺ նախագահ Ալեն Սիմոնյանն արձագանքեց․ «Պարզ չէ, թե դուք ինչու չմասնակցեցիք Վանաձորի ընտրություններին, որպեսզի ձեր նկարագրած զավթումը չլինի»։
Կարդացեք նաև
Լուիզա ՍՈՒՔԻԱՍՅԱՆ
