Կառավարությունն այսօր մերժեց «Պատիվ ունեմ» խմբակցության պատգամավոր Հայկ Մամիջանյանի առաջարկը, որը, որպես օրենսդրական նախագիծ ներկայացվել էր կառավարության քննարկմանը: Նախագիծն ընդգրկված էր կառավարության նիստի օրակարգի չզեկուցվող հարցերի շարքում:
Պատգամավոր Մամիջանյանն առաջարկել էր, որպեսզի յուրաքանչյուր եռամսյակի ավարտից հետո, 20 օրվա ընթացքում արտգործնախարարը տարեկան չորս, իսկ վարչապետը տարեկան 2 անգամ զեկույց ներկայացնեն Ազգային ժողով։ Դրանք վերաբերելու են ՀՀ անվտանգության, պաշտպանության եւ արտաքին քաղաքականության համար ռազմավարական նշանակություն ունեցող հարցերում ընթացող գործընթացներին, դրանց շրջանակներում վարվող բանակցություններին եւ ձեռք բերված կամ հնարավոր պայմանավորվածությունների առանցքը կազմող հիմնարար դրույթներին:
Որպես հիմնավորում Հայկ Մամիջանյանը նշել է, որ առաջարկվող կարգավորումը հնարավորություն կտա պատգամավորներին տեղեկացված լինել Հայաստանի Հանրապետության արտաքին քաղաքականության, պաշտպանության եւ անվտանգության հարցերի վերաբերյալ ձեռք բերված պայմանավորվածությունների, ստորագրված կամ քննարկման փուլում գտնվող փաստաթղթերի եւ ոլորտային այլ կարեւորագույն հարցերի վերաբերյալ, ինչպես նաեւ կստեղծի հնարավորություն խորհրդարանական բոլոր ուժերին, այդ թվում՝ փոքրամասնություն կազմող խմբակցություններին հավասարապես իրացնել Սահմանադրությամբ եւ օրենքով իրենց վերապահված լիազորությունները, մասնավորապես, մշտական հանձնաժողովների աշխատանքների միջոցով իրականացնել խորհրդարանական վերահսկողությունն ավելի լայն ծավալով:
Հայկ Մամիջանյանին պատասխանել է ՀՀ արդարադատության նախարար Կարեն Անդրեասյանը՝ մերժումը հիմնավորելով այսպես. «Հայաստանի Հանրապետության Սահմանադրության 156-րդ հոդվածի համաձայն՝ յուրաքանչյուր տարվա համար կառավարությունը զեկույց է ներկայացնում Ազգային ժողով իր ծրագրի կատարման ընթացքի եւ արդյունքների մասին: Օրենքի 122-րդ հոդվածի 1-ին մասի 2-րդ կետի համաձայն՝ մշտական հանձնաժողովները կանոնակարգի 112-րդ հոդվածի 1-ին մասի 5-րդ կետով սահմանված իրենց իրավասությունների շրջանակում՝ կարող են տեղեկություններ պահանջել Կառավարության ծրագրի կատարման ընթացքի վերաբերյալ»:
Կարդացեք նաև
Նախարարը նաեւ նշել է, որ օրենքի գործող կարգավորումները թույլ են տալիս մշտական հանձնաժողովներին պահանջել տեղեկություններ կառավարության ծրագրի կատարման ընթացքի վերաբերյալ, հետեւաբար առկա են բոլոր մեխանիզմներն անհրաժեշտ տեղեկություններն ստանալու համար:
Լուսինե ԲՈՒԴԱՂՅԱՆ
