Լրահոս
Օրվա լրահոսը

Կենսաքիմիայի ինստիտուտի տնօրենի պաշտոնում ընտրվեց Ալվարդ Անտոնյանը

Մարտ 31,2022 17:14

Ս.թ. մարտի 30-ին ՀՀ Գիտությունների ազգային ակադեմիայի նախագահության նիստում ՀՀ ԳԱԱ Բունիաթյանի անվան կենսաքիմիայի ինստիտուտի տնօրենի պաշտոնում ընտրվեց Ալվարդ Անտոնյանը, ով մինչ այդ ինստիտուտի տնօրենի ժամանակավոր պաշտոնակատարն էր: Նրա թեկնածությունն առաջադրվել է ՀՀ ԳԱԱ Բունիաթյանի անվան կենսաքիմիայի ինստիտուտի գիտական անձնակազմի կողմից և երաշխավորվել ՀՀ ԳԱԱ Բնական գիտությունների բաժանմունքի ընդհանուր ժողովի կողմից:

Ալվարդ Անտոնյանը ծնվել է 1964թ-ին: 1982-1987թթ-ին սովորել է Երևանի պետական համալսարանի կենսաբանության ֆակուլտետի կենսաքիմիայի ամբիոնում, 1990թ-ից եղել է հայցորդ ՀՀ ԳԱԱ Բունիաթյանի անվան կենսաքիմիայի ինստիտուտում, 1996թ-ին ստացել է կենսաբանական գիտությունների թեկնածուի գիտական աստիճան: 1987-1990թթ-ին աշխատել է ՀՀ ԳԱԱ Բունիաթյանի անվան կենսաքիմիայի ինստիտուտում որպես ավագ լաբորանտ, 1990-1997թթ-ին՝ կրտսեր գիտաշխատող, 1997-2008թթ-ին՝ ավագ գիտաշխատող, 2021թ-ից ինստիտուտի առաջատար գիտաշխատող է, 2018թ-ից ինստիտուտի «Ադենիլային միացությունների նյութափոխանակության» լաբորատորիայի վարիչն է։ 2021-2022թթ-ին զբաղեցրել է ինստիտուտի տնօրենի տեղակալի պաշտոնը: 2007թ-ից դասավանդում է ՀՀ ԳԱԱ Գիտակրթական միջազգային կենտրոնի դեղագործական քիմիայի ամբիոնում, 2017թ-ից ամբիոնի դոցենտ է, 43 գիտական հոդվածի և 40 գիտական զեկույցի հեղինակ: Անդամակցում է Նեյրոքիմիկոսների եվրոպական միությանը և Կենսաքիմիկոսների հայկական ասոցիացիային:

Ալվարդ Անտոնյանը ներկայացրեց ՀՀ ԳԱԱ Բունիաթյանի անվան կենսաքիմիայի ինստիտուտի գիտական ուղղությունները՝ նյարդադեգեներատիվ, աուտոիմուն հիվանդությունների մեխանիզմների հետազոտություններ: Նա նշեց, որ առանձնակի ուշադրություն է դարձվում երիտասարդ կադրերի պատրաստմանը, հայաստանյան և արտասահմանյան գիտական կենտրոնների հետ համատեղ հետազոտությունների իրականացմանը: Նրա ներկայացրած զարգացման ծրագրով նախատեսվում է ՀՀ ԳԱԱ Բունիաթյանի անվան կենսաքիմիայի ինստիտուտի բազայի հիման վրա ՀՀ ԳԱԱ Գիտակրթական միջազգային կենտրոնում ստեղծել կենսաքիմիայի ամբիոն, ստեղծել բջջային կուլտուրաների հետ աշխատելու սենյակներ՝ համալրված նոր սարքավորումներով, բացել ակրեդիտացիայի լաբորատորիա վճարովի փորձաքննություն իրականացնելու համար, հարմարեցնել առկա կենդանանոցի պայմանները in vivo աշխատանքների համար ընդունված ստանդարտներին, ակտիվացնել գիտաժողովների և գիտական դպրոցների անցկացումը, ուսանողների համար ստեղծել բազա կենսաքիմիական և վերլուծության մեթոդների ուսուցման համար, դրամաշնորհների ֆինանսավորմամբ գործուղել երիտասարդ աշխատակիցներին արտասահմանյան գիտական հաստատություններ:

ՀՀ ԳԱԱ նախագահ, ակադեմիկոս Աշոտ Սաղյանը նշեց, որ անհրաժեշտ է հաղթահարել առկա խնդիրներն ու մարտահրավերները և զարգացնել, առաջ տանել ինստիտուտը:

ՀՀ ԳԱԱ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Մարտ 2022
Երկ Երե Չոր Հնգ Ուրբ Շաբ Կիր
« Փետ   Ապր »
 123456
78910111213
14151617181920
21222324252627
28293031