Այսօր մի խումբ քաղաքացիներ բողոքի ցույց էին կազմակերպել ՄԱԿ-ի հայաստանյան գրասենյակի, Ֆրանսիայի, ՌԴ-ի, ԱՄՆ դեսպանատների մոտ:
Նրանք պահանջում էին կիրառել բոլոր հնարավոր գործուն մեխանիզմներն ու արգելել Ադրբեջանի կողմից Արցախի հայաթափումն ու էթնիկ զտումը:
ՄԱԿ-ի գրասենյակի մոտ ցուցարարները հայտարարեցին. «Գիտեք՝ ինչ է կատարվում Լեռնային Ղարաբաղում, հատկապես սրված է իրավիճակը վերջին մեկ ամսվա ընթացքում: Միջազգային հանրությունը պետք է բոլոր ջանքերը գործադրի՝ հերթական ցեղասպանությունը կանխելու համար»:
Կարդացեք նաև
Նրանք նամակ հանձնեցին ՄԱԿ-ի գրասենյակի ներկայացուցչին, որտեղ մասնավորապես ասված էր. «Ադրբեջանի կողմից իրագործված պատերազմական հանցագործությունները, այդ թվում՝ խաղաղ բնակիչների եւ գերիների գլխատումն ու անդամահատումը, միջնադարյան ժամանակաշրջանին բնորոշ ծաղրն ու բարբարոսությունը Արցախի խաղաղ բնակիչների, զինվորների եւ գերիների նկատմամբ մեծ հաշվով մնացել են անպատիժ: Միջազգային հանրությունը անցած մոտ երկու տարվա ընթացքում հնչած կոնկրետ գնահատականներով, հասցեական հայտարարություններով հանդես չի եկել: Միջազգային հանրությունն այս ընթացքում համառորեն աչք է փակել այն փաստի վրա, որ 44-օրյա պատերազմի ընթացքում Թուրքիայի կողմից ադրբեջանական բանակում ներգրավվել են նաեւ սիրիացի վարձկան գրոհայիններ»:
Հայտարարության մեջ նաեւ ասվում է, որ Ադրբեջանը չի կատարել նոյեմբերի 9-ի պայմանավորվածությունը, չի վերադարձրել հայ գերիներին, պարբերաբար սադրանքներ է իրագործում սահմանին, շարունակում է ահաբեկել ու սպանել խաղաղ բնակիչներին:
Իսկ վերջին շրջանում նաեւ հոգեբանական ահաբեկչություն է իրականացնում՝ անհնար դարձնելով իրենց հայրենիքում ապրելու հնարավորությունը, ինչը էթնիկ զտման տարրերից մեկն է. «Մենք պահանջում ենք հստակ գնահատական տալ Ալիեւի եւ Էրդողանի հանցագործ քաղաքական ռեժիմին, գործի դնել միջազգային հայտնի սկզբունքները՝ էթնիկ զտումները կանգնեցնելու համար: Փաստերը բազմաթիվ են ու հստակ հիմնավորում են, որ արցախահայության գոյությունը վտանգված է»:
Ցույցի նախաձեռնողներից մեկն էլ հիշեցրեց. «ՄԱԿ-ը մինչ օրս ձեռնպահ է մնացել Արցախում՝ ԼՂ-ում որեւէ ներկայություն ապահովելուց, ներկայություն չի ունեցել, տեղում չի ծանոթացել հումանիտար խնդիրներին: Հետեւաբար ներկայություն ունենալ Շուշիում անմիջապես ցույց է տալիս ՄԱԿ-ի կողմնակալ վերաբերմունքն ու աջակցությունը բռնակալին, ինչը մենք բոլորս դատապարտում ենք»:
Հռիփսիմե ՋԵԲԵՋՅԱՆ
