Արցախի հանրապետությունում «վաստակավոր» եւ «պատվավոր» կոչմանն արժանացած այն կենսաթոշակառուները, ովքեր պետական կամ համայնքային որեւէ պաշտոն չեն զբաղեցնում, ամենամսյա պատվովճար կստանան: Նման որոշում կայացրեց այսօր ԱՀ խորհրդարանը՝ 32 ձայնով կողմ քվեարկելով համապատասխան օրենքներում փոփոխություն կատարելու նախագծին: Գործող օրենսդրությամբ պատվովճար ստանում էր այն անձը, որը թոշակառու է, չի զբաղեցնում պետական կամ համայնքային պաշտոն, չի կատարում այլ վճարովի աշխատանք: Հաջորդ քայլով նախատեսվում է ընդհանրապես սահմանափակումները հանել այս կարգից:
Ազգային անվտանգության մարմինների մասին օրենքում լրացումների եւ փոփոխության նախագծով էլ սահմանվեց ԱԱԾ ստորաբաժանումների՝ ԱՀ սահմանների պաշտպանությանը մասնակցելու իրավական կարգավորումը:
Հարկադիր կատարման մասին օրենքի փոփոխություններով էլ հանվեց պետտուրքի բռնագանձումը՝ ֆիզիկական եւ իրավաբանական անձանց կողմից նվիրատվությունների եւ օգնությունների մասով: Օրենքը հետադարձ ուժ չի ունենա: Կառավարության ներկայացուցիչն ի պատասխան պատգամավորներից մեկի հարցի՝ հստակեցրեց, որ նման դեպք չի եղել:
Նելլի ԳՐԻԳՈՐՅԱՆ
