Դեղերի շուկայում առկա խնդիրների վերաբերյալ քննարկում Ազգային ժողովում
Մարտի 29-ին ՀՀ ԱԺ առողջապահության հարցերի մշտական հանձնաժողովը հրավիրել է աշխատանքային քննարկում՝ «ՀՀ-ում դեղերի շուկայում առկա խնդիրները» թեմայով: Քննարկմանը մասնակցել են ՀՀ-ում դեղերի ներկայացուցչությունների ներկայացուցիչներ:
ԱԺ առողջապահության հարցերի մշտական հանձնաժողովի նախագահ Նարեկ Զեյնալյանը տեղեկացրել է, որ նախորդ օրը նույն թեմայով քննարկում է անցկացվել նաեւ դեղերի ներմուծմամբ զբաղվող ընկերությունների ներկայացուցիչների հետ:
Քննարկման մասնակիցները, մասնավորապես, մտահոգված էին «Դեղերի մասին» օրենքում դեղորայքի զուգահեռ ներմուծմանը վերաբերող դրույթով:
Կարդացեք նաև
Հյուրերի խոսքով՝ զուգահեռ ներմուծումը սահմանվել է դեղերի գնիջեցման նպատակով, որը գործնականում չի կիրառվում, ավելին՝ զուգահեռ ներմուծման անվան տակ շուկայում հայտնվում են անորակ դեղամիջոցներ՝ հաճախ նաեւ սպառնալով ազգային անվտանգությանը: Մասնակիցների կարծիքով՝ զուգահեռ ներկրողները հետապնդում են գերշահույթ ստանալու նպատակ: Նրանց պնդմամբ՝ դեղերի շուկայում գնիջեցման հեղինակները հենց իրենք են: Իրենք նաեւ սոցիալական պարտավորության կրողն են:
Անդրադառնալով չգրանցված դեղերի ներմուծման արգելքին, որն ուժի մեջ է մտել հունվարի 1-ից՝ մասնակիցները հորդորել են որեւէ պարագայում արգելքը չվերացնել, որպեսզի ՀՀ մաքսանենգ ճանապարհով դեղորայք չմտնի: Նմանօրինակ դեղերի նկատմամբ վերահսկողություն չկա, պատասխանատվություն չեն կրում դեղերի որակի, ժամկետների կեղծ լինելու համար:
ԱԺ առողջապահության հարցերի մշտական հանձնաժողովի նախագահ Նարեկ Զեյնալյանն առաջարկել է հյուրերին բարձրաձայնած խնդիրները գրավոր ներկայացնել, խոստացել է դրանք ուսումնասիրել եւ անհրաժեշտության դեպքում՝ կկատարվեն օրենսդրական փոփոխություններ:
ՀՀ Ազգային ժողով
