Aravot.am-ի տեղեկություններով, մարտի 27-ին ոստիկանություն է զանգահարել Ուրցաձոր համայնքի թիվ 13/24 ընտրատեղամասում ծառայություն իրականացնող տեսուչ Դավիթ Նահապետյանը և հայտնել, որ ծեծկռտուք է տեղի ունեցել քաղաքացու և «Իմ հզոր համայնք» կուսակցության անդամի միջև, որը շարունակվել է դրսում:
Ըստ նույն աղբյուրի, ձեռնարկված միջոցառումների արդյունքում պարզվել է, որ ժամը 10-ի սահմաններում նշված ընտրատեղամասում վիճաբանություն է տեղի ունեցել Գ.Կ.-ի եւ «Իմ հզոր համայնք» կուսակցության վստահված անձ Է. Հ.-ի միջև, որը շարունակվել է նաեւ դրսում, ինչի ընթացքում Է. Հ.-ն սեռական բնույթի հայհոյանքներ հնչեցնելով հարվածել է Գ.Կ.-ին:
Գ. Կ.-ից ընդունվել է բանավոր հաղորդում: Հանգամանքները պարզվում են, նախապատրաստվում են նյութեր։
Հիշեցնենք, որ «Իրազեկ քաղաքացիների միավորում» ՀԿ-ի ծրագրերի համակարգող Դանիել Իոաննիսյանն ավելի վաղ ֆեյսբուքյան գրառում էր արել․ «Խիստ մտահոգիչ է Վեդի համայնքի Ուրցաձոր գյուղում առավոտյան տեղի ունեցած միջադեպը, որի ժամանակ ՔՊ-ի կողմնակիցները 13/24 տեղամասի մուտքի մոտ ոհմակով հարձակվեցին ու ծեծի ենթարկեցին մի այլախոհ անձի։
Կարդացեք նաև
Ընդ որում, դա տեղի էր ունենում ոստիկանության զորքերի` առնվազն երեք ծառայողների աչքի առջև, որոնք, ծառայողական պարտականությունների կատարման փոխարեն, հանդիսատեսի դերն էին ընտրել։
Շատ, շատ վաղուց Հայաստանում իշխանության ներկայացուցիչները ոստիկանների լուռ համաձայնությամբ այլախոհ ծեծած չկային։
Հ.Գ. Դեպքի առթիվ ոստիկանությունում նյութեր են նախապատրաստվում։ Պայքարելու ենք, որ այդ ՔՊ-ականները դատվեն Քրեական օրենսգրքի 149.2 հոդվածով, իսկ անգործության մատնված ոստիկանության զորքերի ծառայողները (իրենց անմիջական վերադասների հետ) կարգապահական պատասխանատվության կանչվեն»։
Լուսանկարը՝ 168.am–ի
