«Տարածաշրջանի հավաքական անվտանգության համակարգը բավականին լուրջ վիճակում է։ Ռազմաքաղաքական իրադրությունը եւ աշխարհաքաղաքական զարգացումները բարդ են․ լարվածության ցանկացած օջախ ազդելու է հավաքական անվտանգության, տարածաշրջանի տարբեր սահմանային կետերի, սահմանակից երկրների վրա, այդ թվում՝ ՀՀ-ի»,-խորհրդարանում լրագրողների հետ ճեպազրույցում այսօր հայտարարեց «Հայաստան» խմբակցության պատգամավոր, ՀՀ պաշտպանության նախկին նախարար Սեյրան Օհանյանը՝ անդրադառնալով Արցախում Ադրբեջանի առաջխաղացման համատեքստում հնարավոր նոր սպառնալիքներին։
«Դրա համար ամեն պահի պետք է սպասենք մարտական գործողությունների, պատերազմի։ Եթե ուզում ենք խաղաղություն, պետք է պատրաստվել պատերազմի, իսկ այդ ուղղությամբ այս իշխանության քայլերը չափազանց դանդաղ են։ Նորից շեշտեմ, որ ՀՀ զինված ուժերն ու Արցախ ՊԲ-ն լուրջ ճանապարհ են անցել եւ ամենաունակն են այսօր վերականգնվելու, արագ միջոցառումներ ձեռնարկելու եւ հանդիսանալու ժողովրդի անվտանգության երաշխիք։ Իսկ դրա համար պետք է հրամաններ ստանան, բարեփոխումների օրակարգ ունենան։ Սա գաղտնիքներ է պարունակում, բայց այն, որ Ադրբեջանը հայտնվել է Արցախի եւ ՀՀ սահմաններին, խոսում է այն մասին, որ իշխանությունը չի հաշվարկում անվտանգության ապահովման առաջնահերթությունները, եւ նրա բոլոր գործողություններն ադեկվատ չեն»,-համոզմունք հայտնեց Սեյրան Օհանյանը։
Նրա խոսքով՝ հիմա Ադրբեջանից ցանկացած քայլ հնարավոր է եւ պետք է պատրաստ լինել․ «Մանավանդ, որ ճանապարհների ապաշրջափակման պահանջի ներքո անընդհատ կրկնում են «Զանգեզուրի միջանցք»։ Նրանք այդ ուղղությամբ արդեն ունեն պլացդարմներ, որ գործողություններ իրականացնեն։ Մեր պարտքն է փակել բոլոր այն ճանապարհները, որոնցով Ադրբեջանը կարող է սադրանքների գնալ»։
Պատգամավորը կարծում է, որ ուժային կառույցների հնարավորությունները պետք է օգտագործել ՀՀ սահմաններին, ոչ թե որոշ պաշտոնյաների աթոռները պահելու համար․ «ՀՀ իշխանությունը սեփական հայրենիքի զգացումը, տարածքային ամբողջականություն պահպանելու անհրաժեշտությունը չի գիտակցում»։
Կարդացեք նաև
Լուիզա ՍՈՒՔԻԱՍՅԱՆ
