Aravot.am-ի տեղեկություններով, մարտի 24-ին ՀՀ ոստիկանության ինֆորմացիոն կենտրոնից գրությամբ ստացվել է ՀՀ ԱԱԾ քննչական դեպարտամենտում փետրվարի 14-ին հարուցված քրեական գործի վիճակագրական քարտն այն մասին, որ ՀՀ ԿԳՄՍ նախարարության Շիրակի պետական համալսարանի «Սոցիալական գիտությունների և իրավունքի» ֆակուլտետի դասախոս Հովհաննես Խորիկյանի հաղորդման հիման վրա՝ ՀՀ ԱԱԾ-ում նախապատրաստված նյութերով փաստական տվյալներ են ձեռք բերվել այն մասին, որ նշված ֆակուլտետի դեկան Օֆելյա Հովհաննիսյանը «Սոցիոլոգիա» ֆակուլտետի առաջին կուրսի 2021-2022թթ. առկա ուսուցման մատյանում նույն կուրսի ուսանողուհի Լ. Է.-ի միջոցով, ընդունելության քննություններում անբավարար ստացած եւ ուսանող չհանդիսացող Մ. Հ.-ի վերաբերյալ կեղծ տեղեկություններ է մտցրել մատյանում:
Հանգամանքները պարզվում են, ԱԱԾ քննչական դեպարտամենտում նախապատրաստվում են նյութեր:
Հովհաննես Խորիկյան
Aravot.am-ը թեմայի վերաբերյալ մեկնաբանություն խնդրեց «Սոցիալական գիտությունների և իրավունքի» ֆակուլտետի դասախոս Հովհաննես Խորիկյանից: Պարոն Խորիկյանն ընդամենը հետեւյալը փոխանցեց. «ԱԱԾ-ն գործը հարուցել է, հակակոռուպցիոն կոմիտեն զբաղվում է: Ավելին ասել չեմ կարող»:
Նմանատիպ պատասխան ստացանք նաեւ ֆակուլտետի դեկանից:
Կարդացեք նաև
«Քանի որ գործը քննության մակարդակում է, զերծ կմնամ որեւէ մեկնաբանությունից եւ կսպասեմ հանգուցալուծմանը»,-ասաց Օֆելյա Հովհաննիսյանը:
Գոհար ՀԱԿՈԲՅԱՆ
