Ադրբեջանցի զինվորականները շարունակում են մնալ Փառուխ գյուղի իրենց դիրքերում: Այս մասին ասվում է Ադրբեջանի ՊՆ հաղորդագրության մեջ՝ փաստացի այդպիսով հերքելով Ռուսաստանի ՊՆ ավելի վաղ տարածված հաղորդագրությունը:
«Ցավով նշում ենք, որ Ռուսաստանի ՊՆ-ն իր մարտի 27-ի հայտարարության մեջ նշել է մի շարք պահեր, որոնք չեն համապատասխանում իրականությանը: Մասնավորապես, Ֆարրուխ գյուղի դիրքերում և դրան հարող բարձունքներում որևէ փոփոխություն տեղի չի ունեցել: Տեղեկությունը, որ ադրբեջանցի զինվորականները հետ են քաշվել այդ դիրքերից, իրականությանը չի համապատասխանում: Մեր բանակը լիարժեք վերահսկում է օպերատիվ իրավիճակը»,- ասվում է հաղորդագրության մեջ:
Գերատեսչությունից ընդգծել է, որ իրականությունը նաև չի համապատասխանում այն տեղեկությունը, որ ադրբեջանական կողմը խախտել է հրադադարի ռեժիմը, և որ ադրբեջանցի զինվորականների շրջանում կան վիրավորներ:
«Կրկին կցանկանայինք հիշեցնել, որ Ադրբեջանի տարածքում չկա «Լեռնային Ղարաբաղ» անունով վարչատարածքային միավոր: Ռուսաստանի ՊՆ մարտի 26-ի և 27-ի հայտարարություններում «Լեռնային Ղարաբաղ» եզրի օգտագործումն անհարգալից է միջազգային հանրության, այդ թվում Ռուսաստանի Դաշնության կողմից ճանաչված և ընդունված Ադրբեջանի Հանրապետության տարածքային ամբողջականության նկատմամբ»,- ասվում է հայտարարության մեջ:
Կարդացեք նաև
Ադրբեջանի ՊՆ-ն հիշեցրել է, որ Ռուսաստանի և Ադրբեջանի միջև 2022թ. փետրվարի 22-ին ստորագրված Միութենական գործակցության մասին հռչակագրի առաջին կետում նշվում է, որ «Ռուսաստանի Դաշնությունն ու Ադրբեջանի Հանրապետությունը իրենց հարաբերությունները կառուցում են միութենական գործակցության, երկու երկրների պետական ինքնիշխանության, պետական սահմանների անխախտելիության և տարածային ամբողջականության, անկախության նկատմամբ փոխադարձ հարգանքի, ինչպես նաև միմյանց ներքին գործերին չմիջամտելու սկզբունքին հավատարմության… վրա»:
ՌԴ ՊՆ հաղորդագրության մեջ նշվում է, որ իր հայտարարությամբ ՌԴ ՊՆ-ն միաժամանակ անհարգալից վերաբերմունք է ցուցաբերում այդ Հռչակագրի նկատմամբ: Նաև կոչ է արվում Ռուսաստանի ՊՆ-ին՝ ճշտել Փառուխ գյուղի տեղանունը և օգտագործել դրա ադրբեջանական անվանումը:
Պատրաստեց Վիկտորյա ԱՆԴՐԵԱՍՅԱՆԸ
