Մարտի 23-ին ՀՀ ՔԿ Լոռու մարզի քննչական վարչության Ստեփանավանի քննչական բաժնից տեղեկություն է ստացվել, որ իրենց մոտ քննվող ՀՀ քր. օր. 308 հոդ. 2-րդ մասի հատկանիշներով հարուցվել է քրեական գործ: Ձեռք բերված փաստական տվյալների համաձայն՝ Ստեփանավան քաղաքի Բոնդարեւի փ. 6/1 հասցեում գտնվող 0.007 հա հողամասի նկատմամբ սեփականության իրավունքի պետական գրանցում կատարելու՝ Ստեփանավանի քաղաքապետարանի դիմումի շուրջ հարուցված գույքի նկատմամբ իրավունքի պետական գրանցման վարույթի կասեցման մասին ծանուցում ստանալով՝ Ստեփանավանի նախկին քաղաքապետ Սարգիս Ղարաքեշիշյանը, որն այժմ գտնվում է ՀՀ ԱՆ «Վանաձոր» ՔԿՀ-ում, կազմել է որոշում:
Տարածած տեղեկատվության համաձայն՝ Ստեփանավան համայնքի ավագանու որոշումով 2012 թվականի մայիսի 2-ին կազմված՝ «Հողատեսքի նպատակային եւ գործառնական նշանակությունը փոփոխելու թույլտվություն տալու մասին» վերտառությամբ իրավունք վերապահող պաշտոնական փաստաթուղթը նույն տարվա մայիսի 30-ին ներկայացրել է ՀՀ կառավարությանն առընթեր անշարժ գույքի պետական գրանցում:
Սակայն, քրեական գործով կատարված քննչական եւ դատավարական գործողություններով պարզվել է, որ 2012թ. մայիսի 2-ին Ստեփանավան համայնքի ավագանին նման համարով, վերտառությամբ եւ բովանդակությամբ որոշում չի կայացրել եւ նշված օրը կայացած ավագանու նիստի օրակարգում նման հարց ներառված չի եղել: Կատարվում է նախաքննություն:
Տաթեւիկ ՂԱԶԱՐՅԱՆ
