«Հելսինկյան նախաձեռնություն-92»-ի ԼՂՀ կոմիտեի համակարգող, արցախցի իրավապաշտպան Կարեն Օհանջանյանի հայտարարությունը
Այն, ինչ այսօր տեղի է ունենում Լեռնային Ղարաբաղի Հանրապետությունում, կարելի է որակել որպես Լեռնային Ղարաբաղի Հանրապետության հանձնում Ադրբեջանին՝ ռուս օկուպացիոն զորքերի կողմից:
Ի սկզբանե՝ 44-օրյա պատերազմի ժամանակ, ակնհայտ էր, որ մեր ժողովրդի նկատմամբ Ադրբեջանի ձեռքերով իրականացվող արյունալի սցենարի ետևում կանգնած էր Ռուսաստանը և անձամբ այդ երկրի ղեկավար Վլադիմիր Պուտինը: Եվ այսօր, երբ հերթական զինված պրովոկացիայի պատճառով զոհվում են մեր անմեղ քաղաքացիները, որը տեղի է ունենում ռուսական օկուպացիոն զորքերի թույլտվությամբ և լուռ համաձայնությամբ (այսպես կոչված «խաղաղապահ զորքերի»), մեր ժողովրդի համար առաջանում է էքզիստենցիալ գոյատևման հարցը:
Մեր ժողովրդի համբերությունը վերջացել է և կտրուկ հարց է տալիս. «Ո՞րն է օկուպանտների առաքելությունը: Աստիճանաբար մեր հանձնու՞մը Ադրբեջանին»: Մենք մի անգամ արդեն ղարաբաղյան շարժման ժամանակ բախվել ենք «Կոլցո օպերացիա» անվանումով սովետական զորքերի աննախադեպ հանցագործության հետ, որը նպատակ ուներ ղարաբաղյան հողերը մաքրել հայերից: Այն ժամանակ ես նախաձեռնել եմ ԼՂԻՄ մարզային գործադիր կոմիտեի դիմումը միջազգային հանրությանը՝ կոչ անելով ԼՂԻՄ ամբողջ ժողովրդին տալ քաղաքական ապաստանի կարգավիճակ: Դա իր ազդեցությունն ունեցավ այն ժամանակվա ԽՍՀՄ ղեկավարության վրա: ԵՎ միանգամից դադարեցվեց «Կոլցո» օպերացիան:
Կարդացեք նաև
Այսօր ես հայտարարում եմ, որ մեր ժողովրդի պահանջով սկսելու եմ նման դիմումի նախաձեռնումը՝ Նախագահի և ԼՂՀ ԱԺ կողմից դիմել միջազգային հանրությանը՝ խնդրանքով ապահովել ամբողջ արցախահայության անվտանգ ելքը Արցախից՝ մեր երկրի բոլոր քաղաքացիներին տրամադրելով քաղաքական փախստականի կարգավիճակ: Նման քայլի բոլոր հետևանքները կրում են Ռուսաստանի և Ադրբեջանի իշխանությունները:
ՄԱՄՈՒԼԻ ՀԱՂՈՐԴԱԳՐՈՒԹՅՈԻՆ
