«Տեղի ունեցածն Ադրբեջանի՝ արցախահայությանն իր հայրենիքում ապրելու իրավունքից զրկելու հետեւողական քաղաքականությունն է եւ Արցախի հայության էթնիկ զտման հերթական դրսեւորումը, որին ականատես ենք եղել այն պահից, երբ հակամարտությունն ի հայտ է եկել»,-խորհրդարանում լրագրողների հետ ճեպազրույցում այսօր ասաց ԱԺ արտաքին հարաբերությունների հանձնաժողովի նախագահ, «Քաղաքացիական պայմանագիր» խմբակցության պատգամավոր Էդուարդ Աղաջանյանը՝ անդրադառնալով Արցախում Ադրբեջանի հերթական առաջխաղացման փաստին։
Հիշեցնենք, որ Արցախի Փառուխ գյուղից դեպի Քարագլուխ ադրբեջանական ստորաբաժանումները մի քանի հատվածներում դիրքավորվել են․ հայկական կողմում կան վիրավորներ։
Էդուարդ Աղաջանյանը նշեց․ «Վերջին շրջանում այս գործընթացը ձեռք է բերել առանձնահատուկ, գործնական տեսք, ինչի մասին իշխանությունը քանիցս ահազանգել է միջազգային հանրությանը։ Այդ հատվածում առաջնագիծ եղել է, բայց արձանագրենք կարեւոր հանգամանքը։ Խոսքը ռուս խաղաղապահների պատասխանատվության գոտում գտնվող տարածքի մասին է։ Հիմնական աշխատանքը ռուս գործընկերների հետ է։ Պետք է հասկանանք, թե ինչ պայմաններում է տեղի ունեցել առաջխաղացումը, որի արդյունքում Ադրբեջանի ԶՈՒ-ն հայտնվել է խաղաղապահների թիկունքում, այսինքն՝ շրջանցել է նրանց»։
Աղաջանյանը շեշտեց․ «Մեր ակնկալիքն է, որ ռուս գործընկերներից հստակ պատասխաններ ստանանք, թե ինչպես է սա եղել։ Ակնկալում ենք նաեւ, որ կարճ ժամանակում Ադրբեջանի ԶՈՒ-ն կվերադառնա ելման դիրքեր։ Ադրբեջանի ԶՈՒ թիկունքում է հայտնվել Փառուխ գյուղը։ Ադրբեջանը զբաղեցրել է մի շարք դիրքեր։ Որքանով տեղյակ եմ՝ Քարագլխի մասին է խոսքը։ Այս առաջխաղացմանը հետեւել են գիշերը եւ այսօր տեղային ռազմական գործողությունները։ Կան նաեւ վիրավորներ։ Ադրբեջանը կիրառել է ԱԹՍ-ներ, որքանով տեղյակ եմ՝ բայրաքթարների մասին է խոսքը, որոնք խոցել են ՊԲ որոշ դիրքեր»,-նշեց Էդուարդ Աղաջանյանը։
Կարդացեք նաև
Նրա բնորոշմամբ՝ կատարվածն Ադրբեջանի կողմից հերթական խախտումն է նոյեմբերի իննի փաստաթղթով ստանձնած պարտավորությունների։
Լուիզա ՍՈՒՔԻԱՍՅԱՆ
