«Ահագին բարձունք է՝ ռազմավարական նշանակության։ Պետք չի տալ հակառակորդին»,-ՀՀ ԱԺ-ում լրագրողների հետ ճեպազրույցում այսօր հայտարարեց Արցախի պաշտպանության բանակի նախկին հրամանատար, Արցախի անվտանգության խորհրդի նախկին գլխավոր քարտուղար Սամվել Բաբայանը։ Հիշեցնենք, որ Արցախի Փառուխ գյուղից դեպի Քարագլուխ ադրբեջանական ստորաբաժանումները մի քանի հատվածներում դիրքավորվել են։
«Ընդհանրապես, Ասկերանի ցանկացած դիրք հանձնելը․․․իրավիճակը լուծվող է, որեւէ բան չկա։ Գտնում եմ, որ պետք է կարողանանք տեղում ռուսական ուժերի հետ բանակցել», – համոզմունք հայտնեց Բաբայանը։
Լրագրողները հետաքրքրվեցին՝ հնարավո՞ր է մեծ զարգացումներ լինեն նշյալ հատվածում։ Սամվել Բաբայանը բացասական պատասխան տվեց․ «Բացառվում է։ Հայկական կողմը պետք է պահանջի, որ ռուսական կողմը վերադարձնի այդ բարձունքը, որովհետեւ իրենց իսկ առաջարկով ենք դիրքերը հանել։ Պաշտպանությանը վերաբերող բոլոր խնդիրները պետք է ռուսական կողմի հետ քննարկել, իրենք էլ՝ Ադրբեջանի»։
Սամվել Բաբայանը հավելեց․ «Ներխուժել են, մտել են․․․պետք է պնդել, որ հետ գնան»։
Կարդացեք նաև
Նկատառմանն ի պատասխան, որ ՀՀ-ն է Արցախի անվտանգության երաշխավորը, ինչպե՞ս կարելի է ամեն հարցի լուծում թողնել խաղաղապահների վրա, Սամվել Բաբայանն ասաց․ «Ամեն բան չէ, որ կարող եմ հրապարակային բացատրել։ Ռուսական կողմին պետք է ստիպել հետ տալ այդ դիրքերը։ Մնացածը հասկացեք»։
Լուիզա ՍՈՒՔԻԱՍՅԱՆ
