Ռուսաստանի ԱԳՆ պաշտոնական ներկայացուցիչ Մարիա Զախարովան այսօր ունեցած ճեպազրույցում մի քանի անգամ փորձել է շրջանցել հարցերն այն մասին, թե ինչպիսին է Ռուսաստանի դիրքորոշումը Ասկերանի շրջանի Փառուխ գյուղի ուղղությամբ ադրբեջանական դիրքերի առաջխաղացման հարցում:
«Ես կարծում եմ, որ դա պետք է գնահատեն մեր խաղաղապահ ուժերը, որոնք այնտեղ գտնվում են,- ասել է նա:
Ի պատասխան նույնանման հարցին՝ Զախարովան ասել է. «Եթե խոսենք քաղաքական հայտարարության մասին, ես արդեն ասացի, կողմերից որևէ մեկը չպետք է վատթարացնի առանց այդ էլ լարված իրավիճակը: Եթե խոսում ենք տեղում իրավիճակի մասին, դա այնտեղ գտնվող փորձագետների, զինվորականների գործն է»:
Խոսելով Արցախում գազամատակարարման խնդիրների մասին, Ռուսաստանի ԱԳՆ ներկայացուցիչն ասել է. «Երկու կողմերի հետ շփումներում կողմերին կոչ ենք անում հնարավորինս արագ լուծել տարածաշրջանում գազի մատակարարման հետ կապված խնդիրը: Համապատասխան աշխատանք է տարվում մեր երկրի ԱԳՆ-ի, ՊՆ-ի, Էներգետիկայի նախարարության, «Գազպրոմի» խողովակներով: Ելնում ենք նրանից, որ չի կարելի խորացնել առանց այն էլ ոչ հեշտ մարդասիրական իրավիճակը, և հասարակ մարդիկ չպետք է տառապեն»:
Կարդացեք նաև
Անդրադառնալով սահմանազատման գործընթացի մեկնարկին՝ Զախարովան ասել է, որ շարունակվում են միջկառավարական շփումները:
Զախարովան նաև ասել է, որ փոխվարչապետների գլխավորությամբ եռակողմ աշխատանքային խմբի շրջանակում, «չնայած ոչ այնքան արագ, որքան կուզեինք», ընթանում է տրանսպորտային մայրուղիների նախագծերի փաթեթի համաձայնեցման գործընթացը:
Պատրաստեց Վիկտորյա ԱՆԴՐԵԱՍՅԱՆԸ
