Անատոլի Չուբայսը լքել է Ռուսաստանի նախագահի կայուն զարգացման հարցերով հատուկ ներկայացուցչի պաշտոնը և հեռացել երկրից: Այդ մասին հայտնել են սկզբում Bloomberg և Reuters գործակալությունները, ավելի ուշ նորությունը հաստատել են Կրեմլից, իսկ ռուսական «Կոմերսանտը» հրապարակել է նրա լուսանկարը Ստամբուլից:
Ըստ Bloomberg-ի՝ Չուբայսի հեռանալու պատճառը Ուկրաինայում իրավիճակի վերաբերյալ նախագահ Պուտինի հետ ունեցած անհամաձայնությունն է: Գործակալությունը գրում է, որ Չուբայսը Կրեմլի հետ Ուկրաինա ներխուժման պատճառով կապերը խզած ամենաբարձրաստիճան պաշտոնյան է:
Ավելի ուշ Կրեմլի պաշտոնական ներկայացուցիչ Դմիտրի Պեսկովը «Ինտերֆաքսին» ասել է. «Այո, Չուբայսը սեփական ցանկությամբ հրաժարական է տվել: Իսկ գնացել թե չի գնացել՝ իր անձնական գործն է»:
Ինքը՝ Չուբայսը, իրավիճակը չի մեկնաբանել: Forbes-ի լրագրողներին հաջողվել է հեռախոսով կապ հաստատել նրա հետ: Բայց լսելով հարցը՝ նա չի պատասխանել և անջատել է հեռախոսը: Նա նաև չի արձագանքել Reuters-ի լրագրողի զանգին:
Կարդացեք նաև
Bloomberg-ը Չուբայսին անվանում է ռուսական մասնավորեցման ճարտարապետ և հիշեցնում է, որ հենց Չուբայսն է Պուտինին իր առաջին պաշտոնը տվել Կրեմլում 1990-ականներին, իսկ հետո ողջունել է նրա մուտքը նախագահի պաշտոնում:
Պատրաստեց Վիկտորյա ԱՆԴՐԵԱՍՅԱՆԸ
