Ցավոք, կան նաեւ ոչ բարեխիղճ աշխատող ճանապարհաշինարարական կազմակերպություններ․ 4-5 ընկերության մասին է խոսքը եւ հունվար-փետրվար ամիսներին որոշ ճանապարհաշինարարներ վատ աշխատանքի համար արդեն տուգանվել են, այսինքն՝ իրենց տրվելիք գումարներից պահում է արվել։ Այս մասին այսօր ԱԺ—կառավարություն հարցուպատասխանի ժամանակ հայտարարեց ՀՀ տարածքային կառավարման եւ ենթակառուցվածքների նախարար Գնել Սանոսյանը։
«Միայն Կապան իմ գնալ-գալը Կապանի ճանշինի վրա 5 միլիոն դրամ «արժեցավ», որովհետեւ այն, ինչ տեսա․․․տուգանեցինք անբարեխիղճ աշխատանքի համար։ Մոտ ութ միլիոնի չափով արդեն մի շարք ընկերություններ տուգանվել են»,-հայտնեց Գնել Սանոսյանը։ Իսկ մարտ ամսի տվյալները, նրա խոսքով, կլինեն ապրիլին, իսկ մինչեւ այդ տեսուչները հետեւում են, թե ճանապարհաշինարարներն ինչպես են աշխատում։
Նախարարը նաեւ նշեց, որ մարզային ճանապարհներին խցանումների խնդիրներն առանց ձմեռային անվադողերի երթեւեկող բեռնատարների պատճառով են առաջանում։ Սանոսյանը նաեւ տեղեկացրեց, որ վերջին քառասուն տարում մարտ ամսին երբեք նման քանակի ձյուն չէր տեղացել։
Լուիզա ՍՈՒՔԻԱՍՅԱՆ
