«Քաղաքացիական պայմանագիր» խմբակցության պատգամավոր Էմմա Պալյանն այսօր ԱԺ լիագումար նիստում «Հայաստան» խմբակցությունից Արեգնազ Մանուկյանին կոչ արեց վերադառնալ խորհրդարանական դիվանագիտության դաշտ՝ քննադատելով Ալեն Սիմոնյանի գլխավորած պատվիրակության՝ Բալի մեկնելու առիթով Մանուկյանի այսօրվա որակումները։
Արեգնազ Մանուկյանը ելույթի ընթացքում տեղից խոսեց, եւ ԱԺ փոխնախագահ Ռուբեն Ռուբինյանը նրան նկատողություն հայտարարեց։ Երկրորդ նկատողությունը տրվեց Պալյանի ելույթի ավարտին։ «Ո՞րը կնախընտրեք, տիկին Մանուկյան, գնա՞ք, թե ասեմ։ Դե ցտեսություն»,-ասաց Մանուկյանին Ռուբինյանը եւ ձեռքով արեց։
Ապա «Հայաստան» խմբակցությունից ամբիոնին մոտեցավ Արմենուհի Կյուրեղյանը եւ ՔՊ-ի համար հիշեցրեց Թումանյանի հայտնի տողը․ «Դեռ հեռու է մինչեւ մարդը ձեր ճամփան»։ Ռուբինյանն ընդհատեց․ «Ախր․․․»։ Արմենուհի Կյուրեղյանը շտապեց հիշեցնել, որ ՔՊ-ն ինքն է պարբերաբար գրականություն մեջբերում, ինքն էլ Թումանյանից տող կարդաց։ «Ես այնպիսի՜ գրականություն կարող եմ այստեղից ցիտել, որ․․․ես ձեզ թույլ չեմ տալու այստեղից վիրավորել պատգամավորներին»,-շարունակեց Ռուբինյանը։
Կարդացեք նաև
Կյուրեղյանը պնդեց․ «Չեմ վիրավորում, Թումանյանի քառյակ եմ կարդում»։ Ռուբինյաննն ասաց՝ որ պահին վիրավորանք լսի՝ անջատել կտա խոսափողը։ ՔՊ-ականների շարքից աղմուկ լսվեց։ Արմենուհի Կյուրեղյանը հարցրեց՝ կարդացե՞լ եք, գիտե՞ք ինչի մասին է Թումանյանի այդ քառյակը։ «Լռեք բոլորդ»,-բղավում էր Ռուբեն Ռուբինյանը։
Լուիզա ՍՈՒՔԻԱՍՅԱՆ
