Իջևանի համայնքապետարանի և Հայաստանի տարածքային զարգացման հիմնադրամի համագործակցության արդյունքում՝ համայնքը կունենա 304 000 000 դրամի աջակցություն։ Այդ մասին Aravot.am-ի հետ զրույցում նշեց Իջևանի համայնքի ղեկավար Արթուր Ճաղարյանը։
Նախորդ տարի Իջևան քաղաքային համայնքը միավորվել է հարակից 18 գյուղական համայնքի հետ՝ ձևավորելով նոր խոշորացված համայնք։
Համայնքապետի խոսքով, խնդիրները բազմաթիվ են, սակայն խոշորացման առաջին իսկ օրվանից ձեռնամուխ են եղել դրանց լուծմանը։ Առաջիկա օրերին համայնքը կունենա 2 բազմաֆունկցիոնալ էքսկավատոր, 4 միկրոավտոբուս, 2 աղբատար, 1 ինքնաթափ և 350 մետաղյա աղբաման։
Արթուր Ճաղարյանը նշեց, որ ՀՏԶՀ-ի հետ իրականցվող համատեղ ծրագրի արդյունքում համայնքը կունենա բարեկարգ և մաքուր ճանապարհներ, շուրջ 47000 բնակիչ կօգտվի որակյալ կոմունալ ծառայությունից։ Վերը նշված տեխնիկայի առկայության դեպքում համայնքը ավելի որակով և նվազ ծախսերով կկատարի ՏԻՄ օրենքով նախատեսված իր լիազորությունները (բարեկարգում և այլն)։ Նպաստավոր պայմաններ կստեղծվեն նաև զբոսաշրջության և գործարարության զարգացման համար։
Կարդացեք նաև
Նախատեսվում է նաև տեխնիկայի վճարովի ծառայություններ մատուցելու դիմաց համայնքային բյուջե մուտքագրել տարեկան մոտ 10 մլն․ դրամ։ Համայնքապետի խոսքով` հանդամիջյան ճանապարհների բարեկարգման արդյունքում՝ 2-3 տարվա ընթացքում կավելանա նաև մշակվող գյուղատնտեսական նշանակության հողերի մակերեսը։ Արթուր Ճաղարյանը հավելեց, որ այս ծրագրի համայնքային ներդրումը կազմել է 15 մլն․ 200․000 դրամ։ Այն ամբողջովին հատկացվել է Իջևան համայնքի բյուջեից՝ մինչ խոշորացման գործընթացը։
Լիա ՃԱՂԱՐՅԱՆ
Լուսանկարը՝ Իջևանի համայնքապետարանի
