Խորհրդարանն այսօր քննարկում է «Հայաստան» խմբակցության պատգամավորների հեղինակած՝ «Քրեական օրենսգրքում» եւ «Քրեական դատավարության օրենսգրքում» փոփոխությունների նախագիծը, որով հեղինակներն առաջարկում են ամրագրել՝ ՀՀ տարածքի կամ դրա մասի՝ Հայաստանին պատկանելիությունը կասկածի տակ դնելը կամ հերքելը, նաեւ նշված հանցանքի կատարումը հրապարակայնորեն արդարացնելը կամ քարոզելը պատժվում է տուգանքով` 1-2 մլն դրամով, կամ ազատազրկմամբ` 2-4 տարի ժամկետով:
Նախագծի հեղինակ Արամ Վարդեւանյանը հիմնավորումները ներկայացնելիս շեշտել էր, որ սա իրավական գործիք կլինի նաեւ Ադրբեջանի նախագահի եւ պաշտոնյաների հանդեպ՝ այն Ադրբեջանի, որի դեպքում Եվրոպան աչք է փակում, օրինակ, Ալիեւի կնոջ համար պաշտոն ստեղծելու եւ այդ պաշտոնին նրան նշանակելու ու նմանօրինակ այլ դեպքերի առնչությամբ։
ԱԺ փոխնախագահ Հակոբ Արշակյանի ուշադրությունն այս օրինակը գրավեց։ Նա հարցրեց․ «Իսկ ի՞նչ կասեք ընտրակեղծարարության, եղբորը պաշտոնի նշանակելու, մասնավորապես՝ հատուկ գործերով դեսպան նշանակելու մասին (նկատի ունի Սերժ Սարգսյանի եղբայր Լեւոն Սարգսյանին, որն ԱԳՆ հատուկ հանձնարարություններով դեսպանի պաշտոնն էր զբաղեցնում․-հեղ), կոռուպցիայի մասին, երբ բարձր պաշտոնյան հեռանում է հազարապատիկ անգամ ավելացած միջոցներով, կամ խաղաղ ցուցարարներին քնած ժամանակ զենքով ցրելու մասին, դիմահար կրակով որոշներին սպանելու մասին»։
Արամ Վարդեւանյանը պատասխանեց․ «Եթե ձեր ասածը կապ ունենար նախագծի հետ, կպատասխանեի։ Ձեր նկարագրածից ամեն մեկը որեւէ մեկի համար չի կարող ընդունելի լինել, այդ թվում՝ ձեր իշխանության ժամանակ ծանոթ-բարեկամներին պաշտոնների նշանակելը։ Օրինակ՝ ՀՔԾ-ն ունի պետ, որի հակակշռող կառույցի՝ ԲԴԽ-ի անդամներից մեկը ՀՔԾ պետի՝ ներկայիս հակակոռուպցիոն ծառայության պետի եղբայրն է»։
Կարդացեք նաև
Հակոբ Արշակյանն արձագանքեց, որ բավարարված է պատասխանով։ Արամ Վարդեւանյանը շարունակեց․ «Հենց նաեւ դուք կարող եք ՀՀ տարածքային ամբողջականության առնչությամբ արձանագրել, որ կողմ եք դրա պահպանմանը։ Հուսամ՝ մի օր վերաբերմունք կարտահայտեք նոյեմբերի իննի փաստաթղթի մասին։ Երբ խոսում ենք այն մասին, որ Ադրբեջանի նախագահը կնոջ համար պաշտոն է հորինել, երբեք մեր խնդիրները չդնենք նույն հարթության վրա, որքան էլ որ այդ խնդիրները կան»։
Հակոբ Արշակյանը պատասխանեց, որ իշխանությունը, բանակն ու ժողովուրդը ՀՀ տարածքային ամբողջականության պահպանման համար պատրաստ են զոհաբերել ամենաթանկը։
Լուիզա ՍՈՒՔԻԱՍՅԱՆ
