«Ձեր դեմքին ոչ թե ժպիտ էր, այլ անսահման ուրախություն, հրճվանք՝ թշնամի երկրի ԱԳ նախարարի ձեռքը սեղմելիս։ Այն երկրի, որը մեկ տարի առաջ սպանում էր մեր հայրենակիցներին»,-ԱԺ արտաքին հարաբերությունների մշտական հանձնաժողովում այսօր կառավարության ծրագրի կատարման 2021թ․-ի արդյունքների վերաբերյալ զեկույցի քննարկման ժամանակ անդրադառնալով ԱԳ նախարար Արարատ Միրզոյանի բացատրությանը, թե ինչու էր ժպտում Թուրքիայի ԱԳ նախարարի հետ հանդիպմանը՝ ասաց «Հայաստան» խմբակցության պատգամավոր Արեգնազ Մանուկյանը։
«Ձեր ժպիտն ինչո՞վ օգնեց, որ գոնե մեկ գերի վերադարձվի, որովհետեւ Ադրբեջանն ու Թուրքիան շարունակում են պնդել, որ գործում են միասնական»,-հարցրեց պատգամավորն ու նաեւ հետաքրքրվեց՝ ի՞նչն է խանգարում իշխանությանը հայտարարել, որ Արցախը չի լինելու Ադրբեջանի կազմում։
Արարատ Միրզոյանը նկատեց․ «Ես նման հարցադրումներին բովանդակային պատասխան պետք է տա՞մ»։ Հանձնաժողովի նախագահ Էդուարդ Աղաջանյանն ասաց․ «Կարող եք ոչ բովանդակային պատասխան տալ»։ Միրզոյանը դիմեց պատգամավորին․ «Մասնակի պատասխանել եմ արդեն։ Մնացածը զեղումներ են, ներողություն»։
Արեգնազ Մանուկյանն արձանագրեց․ «Իշխանությունը խուսափում է եւ որեւէ կերպ հստակ չի հայտարարում, որ Արցախը չի կարող լինել Ադրբեջանի կազմում։ Դուք՝ Նիկոլ Փաշինյանը, Էդուարդ Աղաջանյանը, Մարիա Կարապետյանն իրենց հայտարարություններով արդեն փաստել են դա»։
Կարդացեք նաև
Լուիզա ՍՈՒՔԻԱՍՅԱՆ
