Հաշվի առնելով Ադրբեջանի մշակույթի նախարարի մոտեցումը, թե իրենք զբաղվելու են աղվանական մշակութային կոթողների վերականգնումով, հրատապ է դառնում ՅՈՒՆԵՍԿՕ-ի գործուղումն Ադրբեջան։ Այս մասին ԱԺ արտաքին հարաբերությունների մշտական հանձնաժողովում այսօր կառավարության ծրագրի կատարման 2021թ․-ի արդյունքների վերաբերյալ զեկույցի քննարկման ժամանակ հայտարարեց ՀՀ ԱԳ նախարար Արարատ Միրզոյանը։
Հիշեցնենք, որ Ադրբեջանն Արցախի բռնազավթված տարածքներում ոչնչացնում է հայկական հուշարձանների հայատառ արձանագրությունները, դրանք ներկայացնում որպես աղվանական։
«Քաղաքացիական պայմանագիր» խմբակցության պատգամավոր Անուշ Բեղլոյանը նշեց, որ այցի համար Ադրբեջանը նախապայմաններ է դրել ՅՈՒՆԵՍԿՕ-ի առաջ․ «Ինչպիսի՞ն է ձեր դիրքորոշումը, նախարարության պատասխանն ինչպիսի՞ն է լինելու»։ Արարատ Միրզոյանը պատասխանեց, որ դեռեւս նախորդ տարի կառույցի փաստահավաք առաքելության այցը տարածաշրջան չեղավ․ «Բանակցությունները մինչեւ օրս շարունակվում են։ Վերջին անգամ փետրվարին տեսակապով ձեռքբերված պայմանավորվածության համաձայն՝ այցը պետք է լինի։ Ցավոք, ադրբեջանական կողմից տարբեր մեկնաբանություններ կան այցի, դրա վայրի եւ գործառույթների վերաբերյալ»։
Նախարարը հավելեց․ «Կարծում են՝ այցը պետք է կայանա Հաագայի համապատասխան կոնվենցիայի հիման վրա, որը վերաբերում է ռազմական գործողությունների գոտիներում մշակութային արժեքների պահպանությանը։ Առաջնային նպատակը պետք է լինի Ադրբեջանի հսկողության տակ հայտնված տարածքներում հայկական մշակութային հուշարձանների վիճակի գնահատումը»։
Կարդացեք նաև
Լուիզա ՍՈՒՔԻԱՍՅԱՆ
