«Այս օրենսդրական նախաձեռնությունը կատարում ենք նրա համար, որպեսզի էլ ոչ մեկ երբեք լկտիություն չունենա ասել՝ ինչ պետք է, էդ էլ բանակցում ենք: Որպեսզի երբեք ԱԺ-ն, որը առաջնային մանդատ ունեցող կառույց է, այլեւս երբեք չմնա լուսանցքում բանակցային կարեւորագույն որոշումների ժամանակ»,- այսօր «Ազգային ժողովի կանոնակարգ օրենքում» լրացում կատարելու թեմայով «Պատիվ ունեմ» խմբակցության կազմակերպած խորհրդարանական լսումների ժամանակ ասաց խմբակցության քարտուղար Հայկ Մամիջանյանը:
Նա նշեց, որ այս գումարման ԱԺ-ի խորհրդարանական ընդդիմությունը «կոֆե խմող» ընդդիմություն չի ու չի լեգիտիմացնում իշխանական ապազգային որոշումները. «Օրենքը ենթադրում է, որ ՀՀ ԱԳ նախարարը եւ վարչապետը համապատասխանաբար 3 եւ 6 ամիսը մեկ գրավոր փակ գաղտնի ձեւաչափով զեկույց են ներկայացնում ԱԺ-ին հիմնական արտաքին քաղաքական ուղղություններում բանակցային ուղղություններում կատարված աշխատանքի եւ առկա վիճակի վերաբերյալ: Այդ զեկույցները ստանալուց հետո ԱԺ պատգամավորների 25%-ի ստորագրությամբ նշված պատգամավորները հրավիրվելու են ԱԺ՝ հարցերին պատասխանելու համար»:
Նա վստահեցրեց, որ խորհրդարանական ընդդիմությունը հիշում է, թե ինչի համար է եկել ԱԺ՝ մանդատը ստացել է՝ իշխանափոխության համար, բայց նմանօրինակ սահմանափակումները անհրաժեշտ են, քանի դեռ իշխանության են մարդիկ, որոնք Հանրայինի եթերով բացահայտ ադրբեջանական թեզեր են հնչեցնում, ԱԺ ամբիոնից չեն ասում, որ Շուշին ու Հադրութը օկուպացված են, այդպես էլ չեն համարձակվում ասել, որ Արցախը երբեք չի լինելու Ադրբեջանի կազմում:
Մամիջանյանը ելույթը եզրափակեց ներողությունով. «Ես ներողություն եմ ուզում խնդրել փոքրիկ Մարիայից, որը հայտնի դարձավ մի քանի օր առաջ տարածված տեսանյութով: Արցախցի փոքրիկը իշխանության մեջ գտնվող շատ ու շատ մարդկանցից զգալիորեն ավելի հայրենասեր ու պահանջատեր է: Մարիա ջան, դու եւ իմ սանիկը նույն տարիքի եք, կներես, որ քո արդար մանկական ցասման մեղավորներին մենք դեռ չենք վռնդել, կներես, որ հայրենիքը դեռ չենք մաքրել ներքին թշնամուց, կներես մեզ, ճուտիկ ջան, բայց քո պես բալիկներ ունեցող հայրենիքը դատապարտված է հաջողության հասնել: Մարիա ջան, խոստանում եմ, որ մենք բոլորս անելու ենք ամեն ինչ, որ քո մասնակցությամբ հաջորդ տեսանյութերում պատմես բացառապես քո նոր անհոգ մանկական հիշողությունների մասին Արցախից եւ քո կողմից այդքան սիրված Շուշիից»:
Կարդացեք նաև
Հռիփսիմե ՋԵԲԵՋՅԱՆ
