Սյունիքի մարզպետ Ռոբերտ Ղուկասյանի որոշմամբ ձյան աննախադեպ տեղումների, սաստիկ բքի պատճառով Սյունիքի հանրապետական նշանակության մայրուղում եւ մյուս ավտոճանապարհներին ստեղծված արտակարգ իրավիճակի հետեւանքով առաջացող խնդիրների լուծման ու ահազանգերը համակարգելու նպատակով Սյունիքի մարզպետարանում ստեղծվել է օպերատիվ շտաբ։
Շուրջօրյա գործող հեռախոսահամարով կարող են զանգահարել ոչ միայն հայախոս, այլև ռուսախոս, անգլիախոս, պարսկախոս անձինք։ Օպերատիվ շտաբը ժամը 17.00-ի դրությամբ արդեն 32 զանգ է ստացել։ Այս մասին Aravot.am-ին տեղեկացրեց Սյունիքի մարզպետարանի աշխատակազմի քարտուղար Էդգար Մարտիրոսյանը։
«Տարաբնույթ հարցերով են դիմում, բոլոր փորձում ենք աջակցել։ Իրանի Իսլամական Հանրապետության մոտ 200 հոգու տեղավորել ենք Կապանի հյուրանոցներում»,-ասաց Էդգար Մարտիրոսյանը։
Կարդացեք նաև
Մարզի ճանշին ընկերություններն աշխատում են գերլարված ու գերծանրաբեռնված ռեժիմով, ցածր տեսանելիության ու բքի պատճառով՝ ճանապարհաշինարարները չեն կարողանում ձնամաքրման աշխատանքներ իրականացնել։ Ի դեպ, հիշեցնենք, որ օրեր առաջ տարածքային կառավարման եւ ենթակառուցվածքների նախարար Գնել Սանոսյանը Կապանում՝ լրագրողների հետ ճեպազրույցում, որ անպատասխանատու ճանշին ընկերությունների նկատմամբ կիրառվելու են պատժիչ մեթոդներ։
Սյունիքի մարզպետարանում ստեղծված օպերատիվ շտաբն աշխատելու է ողջ գիշեր։ Մեկ անգամ եւս հիշեցնենք, որ ուղեւորներն ու վարորդները շտապ արձագանք պահանջող խնդիրների, կեցության, սննդի, առողջական ու այլ հրատապ հարցերի եւ կարիքների համար կարող են զանգահարել 077933955 հեռախոսահամարով։
Արմեն ԴԱՎԹՅԱՆ
