Քանի դեռ պահքի շրջանն է, շարունակենք ներկայացնել բուսական հիմքով բաղադրատոմսեր:
Թարմացնող թարխունով աղցանը վստահաբար շատ կհավանեք, իսկ բոկ չոյը կամ պակ չոյը, որը համեմատաբար նոր բույս է հայաստանյան շուկայում, այնքան օգտակար է, որ պետք է հաճախ օգտագործել սննդի մեջ: Մեր սուպերմարկետներում արդեն կա չինական կաղամբի այս տեսակը, սակայն շատերը չգիտեն ինչպես օգտագործել: Տաք աղցանը, որ կառաջարկեմ բոկ չոյով, նույնպես շատ համեղ է: Ի դեպ, այդ նույն աղցանը նույն ձեւով կարող եք պատրաստել փոխարինելով բոկ չոյը մեզ ավելի քաջածանոթ սպանախով, բազուկի տերեւներով կամ արդեն ավանդական թվացող չինական կաղամբով:
Թարխունով աղցան
Անհրաժեշտ մթերքները
Թարխուն-3 կապ
Կարդացեք նաև
Ընկույզ- 1 բաժակ (կարող եք վերցնել ավելի քիչ, կարող եք փոխարինել արեւածաղիկի կամ դդումի մաքրած սերմերով)
Նուռ-1 հատ
Ձիթապտղի յուղ-4 ճաշի գդալ
Աղ, սեւ եւ կարմիր պղպեղ՝ ըստ ճաշակի
Պատրաստման եղանակը
Թարխունը լավ լվանալ, չորացնել: Տերեւները առանձնացնել ցողուններից: Նուռի մեծ մասը մաքրել, մի կտորը ճզմել, հյութը հանել: Թարխունի տերեւների վրա լցնել կտրատած ընկույցը, նռան հատիկները: Նռան հյութի վրա լցնել աղը, պղպեղները, բուսական յուղը: Եթե ունեք նռան օշարակ, կարող եք մեկ ճաշի գդալ էլ նռան օշարակ ավելացնել: Ստացված թանձրուկը լավ խառնել, լցնել աղցանի վրա եւ մատուցել:
Բոկ չոյով (պակ չոյով) տաք աղցան
Անհրաժեշտ մթերքները
Բոկ չոյ- 6-7 հատիկ
Գլուխ սոխ- 0,5 հատ (եթե փոքր է՝ մեկ հատ)
Սխտոր-3-4 պճեղ
Կծու թարմ պղպեղ- մի փոքր կտոր (կարող եք վերցնել նաեւ մի պտղունց աղացած կծու չիլի)
Բուսական յուղ- 4-5 ճաշի գդալ
Սոյայի սոուս- 3 ճաշի գդալ
Կիտրոն- 1 հատ
Քունջութի սերմեր- 1 ճաշի գդալ (պարտադիր չէ)
Պատրաստման եղանակը
Բանջարեղենը մաքրել, լավ լվանալ: Խորը թավայի մեջ տաքացնել բուսական յուղը: Տապակել սկզբում շերտատած սոխը, ապա ավելացնել սխտորը. պղպեղը, որից հետո՝ պակ չոյը: Շատ եփել պետք չի, մեկ-երկու րոպե տապակելուց հետո ավելացնել սոյայի թանձրուկը, լավ խառնել եւ անջատել, եթե քունջութի սերմեր ունեք, դա էլ ցանեք վրան եւ վերջ: Մատուցեք տաք վիճակում, թեեւ սառելուց հետո էլ շատ համով է:
Մանրամասները՝ տեսանյութում:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
