«Ռեֆորմիստներ» կուսակցության նախաձեռնությամբ կազմակերպված «Ռուսաստան-Արեւմուտք հակամարտություն. մեր տեղը նոր աշխարհակարգում» թեմայով համաժողովին մասնակցեցին տարբեր քաղաքական ուժերի, հասարակական կազմակերպությունների ներկայացուցիչներ, գիտության մարդիկ, փորձագետներ եւ անհատ անձինք:
Համաժողովից առաջ «Ռեֆորմիստներ» կուսակցության նախագահ Վահան Բաբայանը Aravot.am-ին ասաց. «Դեռ 2016 թվականին, երբ հիմնադրվեց մեր կուսակցությունը, մենք հայտարարել էինք, որ պետք է խորացնել հարաբերությունները Ռուսաստանի Դաշնության հետ: Այսօրվա աշխարհաքաղաքական իրողությունները մեզ եւս մեկ անգամ թելադրում են, որ անհրաժեշտ է ոչ միայն հայտարարություններ, այլ սկսել կոնկրետ քայլեր անել: Մենք պետք է հասկանանք հետեւյալը. կամ ընդունելու ենք Թուրքիայի կողմից մոտալուտ օկուպացիան՝ տնտեսական, ռազմական կամ այլ ձեւով, կամ պետք է ջերմ հարաբերությունները շարունակել Ռուսաստանի հետ եւ նոր ինտեգրացիոն հարթակներ փնտրել՝ լինի միություն, կոնֆեդերացիա կամ այլ տիպի համագործակցություն: Դա մեզ անհրաժեշտ է: Մեզանում քաղաքական ուժեր կան, որոնք դեռ չեն հասկանում, որ այսօրվա աշխարհն այլեւս այն չէ, ինչ փետրվարի 24-ից առաջ էր: Հայաստանը պետք է կողմնորոշվի: Մենք չենք կարող չեզոքություն պահպանել եւ որպես դաշնակից ժողովուրդ ու պետություն, պարտավոր ենք կանգնել Ռուսաստանի կողքին:
Սա շատ կարեւոր է: Քանի որ մենք ֆաշիզմը տեսած ազգ ենք՝ 1915 թ. ցեղասպանություն, Սումգայիթի ու Բաքվի դեպքեր, 2020 թվականի 44-օրյա պատերազմ, մեր կուսակցությունը կարծում է, որ ֆաշիզմի դեմ պայքարում Հայաստանը պետք է կանգնի Ռուսաստանի կողքին: Այլընտրանք, պարզապես, չունենք:
Սա առաջին քայլն է՝ համախմբելու մեզ նման մտածող մարդկանց, ու նրանց թիվը շատ մեծ է: Իսկ նրանք, ովքեր քննադատում են Ռուսաստանի գործողությունները, ինչ-որ բաներ են խոսում, դրանք ակտիվ փոքրամասնությունն են: Մենք ուզում ենք եւ պետք է կարողանանք արթնացնել իրական մեծամասնությանը եւ ցույց տալ, թե ինչպիսին է հայ ժողովրդի մտածելակերպը»:
Կարդացեք նաև
Աշոտ ՀԱԿՈԲՅԱՆ
