«Մենք բանակում երկու զոհ ունենք, ու ասում են` որ չկա պատշաճ կարգապահություն: Հիմա այդ կարգապահությունը, որ չկա, ո՞ր մի սպան է պատասխանատվության կանչվել», – «Հայելի» ակումբում ասաց ՀՀ մարդու իրավունքների առաջին պաշտպան Լարիսա Ալավերդյանը: Նրա խոսքով, ինչքան էլ տարբերվենք ու ինչքան էլ դրվագներ բերվեն, պետք է հստակեցվի, որ ոչ միայն համաշխարհային, այլեւ տեղական մասշտաբով տեղի է ունենում շատ գռեհիկ, կոշտ մեթոդներով քաղաքականության իրականացում:
«Ինձ համար այստեղ չկա երկու տարբեր խճանկար, երկրում կատարվող ամեն բան մի խճանկարի մեջ է՝ Ադրբեջանը եւ Հայաստանը իրականացնում են տարբեր ուղղությամբ իրար հետ ըստ արդյունքների համաձայնեցված քաղաքականություն: Ընդ որում` Ադրբեջանը հստակ քաղաքականությամբ ստեղծում է այնպիսի պայմաններ, որոնք անտանելի լինեն Արցախի բնակիչների համար, եւ գա մի օր, որ նրանք մոռանան, որ դարեր շարունակ պայքարել են իրենց հողի վրա անկախ ապրելու համար ու որոշեն հեռանալ: Թեեւ համոզված եմ, որ արցախցիները դա չեն անի: Ուղղակի այն գինը, որ վճարում է հայ ժողովուրդը, ոչ թե ապաշնորհ քաղաքականության արդյունք է, այլ օրվա իշխանությունների կողմից իրականացվող հետեւողական քաղաքականության, որը միայն ծառայում է թուրք-ադրբեջանական ցեղասպանական ծրագրերին: Ինչքան էլ գամ ասուլիսի, ինչ հարց էլ տաք, միեւնույն է՝ կրկնելու եմ այդ բանաձեւը արյունով է գրված»:
Տիկին Ալավերդյանի խոսքով, այդ բանաձեւը ամեն անգամ կրկնվում է, երբ ժողովուրդը պատմության որեւէ շրջանում մոռանում է, թե ում հետ պետք է բարեկամություն անել, ում հետ հարեւանություն եւ ումից պետք է պաշտպանվի կամ հստակեցնի իր ռազմավարությունը: «Այս իշխանությունների գիտելիքը զրո է քաղաքականության մեջ, իրենց բոլոր խաղերը բոլորը հասկացել են»,-ասում է նա:
Գոհար ՀԱԿՈԲՅԱՆ
