Եվրասիական տնտեսական միության խորհուրդը հրահանգել է Եվրասիական տնտեսական հանձնաժողովի (ԵՏՀ) կոլեգիային ԵԱՏՄ անդամ պետությունների հետ մշակել առաջարկներ անդամ պետությունների ներքին շուկաների կայունությունն ապահովելու մեխանիզմների մասով, այդ թվում դիտարկել ԵԱՏՄ տարածքից որոշակի տեսակի գյուղտնտեսական մթերքներ դուրս բերելու հարցում համատեղ միջոցառումների սահմանման հավանականությունը:
Այդ նպատակով ԵԱՏՄ երկրներին առաջարկվել է ԵՏՀ-ին ներկայացնել տարեկանի և ցորենի, գարու, եգիպտացորենի, արևածաղկի ձեթի և շաքարի տարեկան արտադրության և սպառման հաշվարկային ծավալները՝ համապատասխան հաշվեկշիռներ ձևավորելու համար:
«ԵԱՏՄ-ն գյուղատնտեսական արտադրանքի խոշորագույն զուտ արտահանող է, այդ պատճառով կենսական կարևոր նշանակության ապրանքների պակասուրդ մեզ չի սպառնում: Միաժամանակ ոչ տարիֆային կարգավորման միասնական միջոցների սահմանումը կնպաստի ներքին շուկային գնային իրավիճակի կայունացմանը, ինչը հատկապես կարևոր է արտաքին գործոնների ազդեցության պայմաններում»,- ասել է ԵՏՀ առևտրի նախարար Անդրեյ Սլեպնյովը:
Պատրաստեց Վիկտորյա ԱՆԴՐԵԱՍՅԱՆԸ
