ԱԺ «Քաղաքացիական պայմանագիր» խմբակցության պատգամավոր Արման Եղոյանից այսօր լրագրողները հետաքրքրվեցին՝ ինչ նկատի ուներ, երբ օրերս մեկ այլ հարցազրույցում ասել է, որ հայկական կողմը եւս առաջարկներ է ներկայացնելու Ադրբեջանին, եւ ինքն իշխանությունից միակն է, որ ասել է՝ Արցախը չի կարող լինել Ադրբեջանի կազմում․ «Դա ձե՞ր կարծիքն է, թե իշխանության կարմիր գիծն է բանակցություններում»։ Արման Եղոյանն արձագանքեց․ «Պետք չի, որ դուք ամեն ինչ իմանաք։ Դուք ասելով նկատի ունեմ լայն շրջանակներին, որովհետեւ դիվանագիտության մեջ, երբ ամեն ինչ իմանում են, դա էլ չի լինում դիվանագիտություն։ Ադրբեջանն առաջարկել է իր համար ընդունելի առաջարկներ, որոնց շուրջ պետք է խոսել։ Տրամաբանական է, որ մենք էլ մեր առաջարկները ներկայացնենք»։
Դառնալով «Արցախը չի կարող լինել Ադրբեջանի մաս» պնդմանը՝ Եղոյանն ասաց, որ դա ոչ թե կարծիք է, այլ պարզ տրամաբանություն, որովհետեւ Արցախի կարգավիճակը դեռ որոշված չէ, իսկ ԵԱՀԿ ՄԽ համանախագահության կողմից կարգավորման հիմքում դրված երեք սկզբունքներից մեկը՝ ուժի չկիրառումը, արդեն խախտվել է, ուստի չպետք է թույլ տալ, որ ազգերի ինքնորոշման սկզբունքն էլ խախտվի․ «Սա հայտնագործություն չէ»։
Լրագրողները հետաքրքրվեցին՝ Արցախն Ադրբեջանի կազմում լինելու հարցը ՀՀ իշխանության կողմից քննարկման ենթակա հա՞րց է Ադրբեջանի հետ բանակցություններում, թե որպես ելման կետ է ընդունված Արցախն Ադրբեջանի կազմում չլինելը։ Արման Եղոյանը պատասխանեց, որ հարցը սխալ է կառուցված․ «Բանակցություններում ամեն մեկը սեղանին իր օրակարգն է դնում։ Մեր պատասխանն է այն, որ Արցախի հարցը պետք է կարգավորվի ՄԽ համանախագահության առաջարկած երեք սկզբունքների համաձայն»։
Լրագրողը կրկնեց հարցը՝ «դա ենթադրո՞ւմ է, որ Արցախը լինելու է Ադրբեջանի կազմում»։ Եղոյանն ի պատասխան լրագրողին մեղադրեց անբարեխիղճ լինելու մեջ․ «Դա հարց չի, այլ ուղղորդող պնդում՝ հարցական նշանով։ Երբ ասում եմ հիմնարար սկզբունքներ, դրանից բխում է ազգերի ինքնորոշման սկզբունքը ներառյալ»։
Կարդացեք նաև
Պատգամավորը շեշտեց, որ կարմիր գծերը քննարկման սեղանի շուրջ են ձեւավորվում։
Լուիզա ՍՈՒՔԻԱՍՅԱՆ
