Աշխատանքի եւ սոցիալական հարցերի նախարար Նարեկ Մկրտչյանը այսօր ԱԺ հանձնաժողով նիստում ներկայացրեց 2021-ի կառավարության ծրագրի կատարողականը:
ՔՊ պատգամավոր Զարուհի Բաթոյանը նպաստների համակարգի բարեփոխման, ինչպես նաեւ շուրջօրյա խնամքի հաստատությունները վերակազմակերպելու ու երեխաներին ընտանիք ուղարկելու մասին հարց ուղղեց: Նախարարը պատասխանեց, որ պետք է կարողանան աղքատ ընտանիքների կարողությունները զարգացնել, ոչ թե նրանց օգնեն գումարով. «2023-ին ներդրվելու է անապահովության գնահատման նոր համակարգ, պետք է կարիքից բխող ծառայություններ մատուցել մեր քաղաքացիներին: Ինչ վերաբերում է խնամքի կենտրոններին, մասնավորը արդեն փոքրիկ խմբային տների տարբերակն ունի եւ հաջող իրականացնում են: Մենք նույնպես ՀՀ-ում հավատարմագրված դեսպանությունների եւ UNDP-ի հետ համագործակցությամբ հայեցակարգ ենք մշակել ու փոքր տներ գնելու գործընթաց ենք սկսել: Այս տարի պետք է որ ունենանք»:
Պարզաբանվեց, որ ուսումնասիրել են 7 ոչ պետական մանկատներ՝ իրենց մասնաճյուղերով, զեկույցն ուղարկել են վարչապետի աշխատակազմ: Մանկատներում, ցավոք, բնակվում են 18 տարին լրացած քաղաքացիներ: Օրինակ, Խարբերդի մանկատանը ունենք 41 տարեկան տղամարդ, որը մոտ 20 տարի առաջ պետք է տեղափոխվել որեւէ կեցության վայր՝ չի տեղափոխվել:
Հռիփսիմե ՋԵԲԵՋՅԱՆ
