Այսօր լրագրողները փոխոստիկանապետ Արա Ֆիդանյանից հետաքրքրվել են, թե ինչպե՞ս է Ոստիկանությունը բացահայտում վարչապետի, նրա ընտանիքի անդամների հասցեին ուղղված վիրավորական արտահայտությունների դեպքերը, բացահայտման ի՞նչ ընթացակարգեր են գործում, ո՞ր վարչության, ո՞ր ռեսուրսով են ուսումնասիրում:
Փոխոստիկանապետն ուղիղ պատասխան չի տվել, նա ներկայացրել է վիրավորանքներ հասցնելու դեպքերի պաշտոնական թվեր:
Նրա տվյալներով՝ 2021 թվականի ընթացքում ՔՐ օրենսգրքի 137. 1 հոդվածի հատկանիշներով (անձին ծանր վիրավորանք հասցնելը) գրանցվել է 268 դեպք , որից 17-ը դատարան է ուղարկվել, 134-ը՝ կարճվել, 16-ը՝ կասեցվել, 101-ը ընթացքի մեջ են: Այս տարվա մարտի 17-ի տվյալներով՝ նույն հոդվածի հատկանիշներով 240 դեպք է գրանցվել, 4-ն ուղարկվել է դատարան, 5-ը՝ կասեցվել, 83-ը՝ կարճվել, 148 դեպք ընթացքի մեջ է: Գրանցված դեպքերից 64-ը, ըստ Արա Ֆիդանյանի, անձի հանրային գործունեությամբ են պայմանավորված:
Բացահայտման ընթացակարգերին վերաբերող հարցին անդրադառնալով՝ փոխոստիկանապետն ասաց, որ ուսումնասիրում են բոլոր հնարավոր միջոցները, որտեղ կարող է լինել հանցագործության մասին տեղեկատվություն, ուսումնասիրում են, թե տվյալ արարքներում առկա՞ են հանցակազմի հատկանիշներ, թե՞ ոչ:
Կարդացեք նաև
Արա Ֆիդանյանը չհամաձայնեց նաեւ տեսակետներին, որ ոստիկանությունը լծված է միայն Նիկոլ Փաշինյանի ու նրա ընտանիքի անդամների հասցեին ուղղված վիրավորանքների բացահայտման գործին, բայց նույն ջանասիրությամբ չի բացահայտում ընդդիմադիր գործիչների հասցեին ուղղված վիրավորանքների դեպքերը:
Արփինե ՍԻՄՈՆՅԱՆ
Հ.Գ.- Հիշեցնենք, որ մինչ այդ, երբ փոխոստիկանապետերին լրագրողները հարցրել են, թե ինչո՞ւ ոստիկանները չեն կարողացել պաշտպանել կնոջը, որն իր նախկին ամուսնու դեմ բազմիցս բողոքներ է գրել, եւ ի վերջո, սպանել է թե՛ կնոջը, թե՛ ինքն իրեն, ոստիկանապետի տեղակալները պատասխանել են, որ ռեսուրսներ չունեն:
