Ուկրաինայի համար փոխադրվող ցանկացած սպառազինություն, որը կմտնի այդ երկիր, Ռուսաստանը կարող է դիտել որպես թիրախ: Այդ մասին հայտարարել է Ռուսաստանի արտգործնախարար Սերգեյ Լավրովը Russia Today-ին տված հարցազրույցում:
«Մենք հստակ ակնարկել ենք, որ ցանկացած բեռ, որը կմտնի Ուկրաինայի տարածք, և որը մենք կհամարենք, որ զենք է տեղափոխում, կդառնա օրինական թիրախ: Դա միանգամայն հասկանալի է»,- ասել է նա:
Լավրովը նաև ընդգծել է, որ Մոսկվան թույլ չի տա Կիևին մատակարարել Ս-300 զենիթահրթիռային համալիրներ այլ երկրներից:
«Ելնելով պրագմատիկ պատճառներից՝ նրանք ենթադրում են, որ կարելի է խնդրել ՆԱՏՕ-ի անդամներին, որոնք ունեն խորհրդային արտադրության ՀՕՊ, որ իրենց պաշտպանեն: Ցանկանում եմ հիշեցնել բոլոր երկրներին, որոնք դիտարկում են այդ գաղափարը, որ խորհրդային համակարգերը և ռուսական արտադրության համակարգերն այնտեղ գտնվում են համաձայն միջկառավարական պայմանագրերի ու համաձայնագրերի, որոնք նաև ունեն օգտագործողի հավաստագիր: Եվ այդ հավաստագիրը թույլ չի տալիս դրանք ուղարկել երրորդ երկրներ»,- ասել է Լավրովը:
Կարդացեք նաև
Հիշեցնենք, ավելի վաղ Սլովակիայի պաշտպանության նախարարը հայտարարել էր, որ իրենք կարող են Կիևին փոխանցել Ս-300 համալիրներ, հենց որ ՆԱՏՕ-ից կամ ԱՄՆ-ից դրանց փոխարինողներ ստանան:
Պատրաստեց Վիկտորյա ԱՆԴՐԵԱՍՅԱՆԸ
