ՀՀ ԱԺ գիտության, կրթության, մշակույթի, երիտասարդության եւ սպորտի հարցերի եւ ԱՀ ԱԺ կրթության, գիտության, մշակույթի եւ երիտասարդության հարցերի մշտական հանձնաժողովները Սիսակ Գաբրիելյանի եւ Արամ Հարությունյանի նախագահությամբ մարտի 17-ին շարունակել են համատեղ նիստի աշխատանքը: Մասնակցել են նաեւ հայաստանյան ՏՏ ոլորտի ներկայացուցիչներ:
ԱՀ ՏԿԵ նախարարի տեղակալ Սմբատ Պետրոսյանը ներկայացրել է Արցախում տեղեկատվական տեխնոլոգիաների ոլորտի ներկան, զարգացման միտումներն ու մարտահրավերները:
Նշվել է, որ Արցախում գործում է ՏՏ ոլորտի 8 ընկերություն, որի հիմնական մասը երեւանյան ընկերությունների մասնաճյուղեր են, որոնք ընդհանուր ունեն 100 աշխատակից: Երեք ընկերություն ունի շուրջ 10 աշխատակից: Ստեփանակերտում գործում է Թումո կենտրոնը: Գործում է նաեւ 23 ԱՐՄաթ լաբորատորիա:
Բանախոսի հավաստմամբ՝ 2011թ. ստեղծվել է ՏՏ ոլորտի 6 աշխատակցից բաղկացած թիմ: Ներկա դրությամբ թիմի անդամների թիվը 20-25 է:
Կարդացեք նաև
Ոլորտում պետական քաղաքականությունն ուղղված է եղել ավելի շատ ընկերություններ ստեղծելուն: Սահմանվել են հարկային արտոնություններ, բոլոր ընկերություններն ազատվել են շահութահարկից:
Սմբատ Պետրոսյանի խոսքով՝ պետության քաղաքականությունը պետք է ուղղված լինի ժամանակակից միջին եւ բարձր մասնագետների պատրաստմանը:
Որպես առաջին խոչընդոտ ոլորտի զարգացման համար՝ նա շեշտադրել է անգլերենի վատ իմացությունը, ծրագրերի թերի ֆինանսավորումը, մալուխային համացանցի նպատակային սփռման բացակայությունը, ինչպես նաեւ մասնագետների պակասը:
«Նախատեսում ենք ՏՏ ոլորտի ընկերություններ ստեղծել շրջկենտրոններում՝ Ստեփանակերտից դուրս»,- ասել է փոխնախարարը: Նա նաեւ նշել է, որ Արցախում չկա ՏՏ ոլորտի մասնագետների պատրաստման կենտրոն:
Սմբատ Պետրոսյանը պատասխանել է նաեւ ներկաների հարցերին:
Մշտական հանձնաժողովի անդամ, ԱՀ ԱԺ նախագահի տեղակալ Գագիկ Բաղունցը նշել է, որ Արցախի իշխանությունը պատրաստակամ է աջակցել հստակ ծրագրերի իրականացմանը:
Հայաստանյան ՏՏ ոլորտի ներկայացուցիչները նույնպես իրենց պատրաստակամությունն են հայտնել աջակից լինել Արցախի ՏՏ ոլորտի զարգացմանն ու մասնագետների պատրաստմանը:
Նիստի ավարտին մասնակիցներն այցելել են Երեւանի ԱՐՄաթ լաբորատորիա:
ՀՀ Ազգային ժողով
