Aravot.am-ի տեղեկություններով՝ մարտի 16-ի երեկոյան ՀՀ ՊՆ N զորամասի պահպանության տեղամասի մարտական դիրքում, իրեն ամրակցված «ԱԿ-74» տեսակի ինքնաձիգից կզակի շրջանում արձակած կրակոցից հրազենային մահացու վիրավորում ստացած Ալբերտ Սիրոյանը Արարատի մարզից էր: Մահացածը միակողմանի ծնողազուրկ էր, ուներ մեկ քույր: Ալբերտը սոցիալապես ծանր վիճակում ապրող ընտանիքի զավակ էր: Ծառայության մեկ տարին էլ մի քանի օրից էր լրանալու:
«Հերը շուտ էր մահացել, անհեր մեծացած տղա է, երես առած չի եղել, շատ խելացի տղա էր, հեսա էս ամսի 21-ին ծառայության մեկ տարին կլրանար, »,-Aravot.am-ին ասաց համայնքի ղեկավարը:
Մամուլում շրջանառվում է տեղեկություն, թե պատահածը ինքնասպանություն էր, ավելին, հրապարակվել է նաեւ, թե իբրեւ Ալբերտ Սիրոյանը թեժ վիճաբանություն է ունեցել ծառայակցի հետ ու նրան ծանր հրազենային վիրավորում պատճառելուց հետո է ինքնասպանություն գործել: Սակայն «Առավոտին» քննչական կոմիտեից ասացին, որ նման տեղեկություն չեն ստացել:
Ալբերտ Սիրոյանին համայնքի ղեկավարը բնորոշեց շատ ժիր ու լավ տղա, ասաց՝ բոլորին է զարմացրել այդ դեպքը: Ոչ ոք չի պատկերացնում, որ նա կարող էր ինքնասպանության դիմել: Մեր զրուցակիցը նաեւ վստահեցրեց, որ Ալբերտը մոր հետ զրույցներում երբեւէ չի դժգոհել ծառայությունից, հնարավոր խնդիրների մասին տեղեկություններ չի հայտնել:
Կարդացեք նաև
Արփինե ՍԻՄՈՆՅԱՆ
