«Իշխանությանը պետք է մտահոգի, որ 2019-ին եղած հանրային բարձր ընկալման ցուցանիշն իջել է: Այստեղ կա լուրջ մտահոգություն, որ բարեփոխումները դեռևս իրենց անհրաժեշտ ազդեցությունը չեն ունեցել ոստիկանական համակարգում և վարքագծի վրա: Իսկ դա արտահայտվում է հանրային ընկալումներում,- «Մեդիա կենտրոնում» անցկացվող «Իրավապահ մարմինների կամայականությունները, ոստիկանության հանդեպ վստահությունը՝ համաթվերով» թեմայով մամուլի ասուլիսի ժամանակ հայտարարեց «Հելսինկյան քաղաքացիական ասամբլեայի Վանաձորի գրասենյակ» ՀԿ նախագահ Արթուր Սաքունցը:
Տեղեկացնենք՝ «Հելսինկյան քաղաքացիական ասամբլեայի Վանաձորի գրասենյակի» կողմից հետազոտություններ են իրականացվել 2015, 2017, 2019, 2021 թվականներին «Մարդու իրավունքների վրա հիմնված պատասխանատու ոստիկանության ստեղծում» ծրագրի շրջանակներում: Ուսումնասիրություններ են կատարվել «Հասարակական հետազոտությունների առաջատար խումբ» ՀԿ-ի կողմից:
Ըստ Արթուր Սաքունցի՝ այս հետազոտությունն ազդակ է քաղաքական իշխանություններին, թե ինչպիսին են հանրային ընկալումները իրավապահ մարմինների գործունեության հետ կապված, քանի որ նրա փաստմամբ՝ ուրիշ այլ մարմին, քան ոստիկանությունն է, որի հետ քաղաքացիներն անմիջապես առնչվում են տարբեր հասարակական միջոցառումների ժամանակ, ուղղակի չկա:
Ուսումնասիրության ընթացքում փորձ է արվել պարզել՝ ըստ հանրային ընկալումների՝ որքան հաճախ են իրավապահ մարմինները իշխանությունների կողմից օգտագործվում՝ որպես քաղաքական հակառակորդների և ընդդիմության դեմ գործիք: Արթուր Սաքունցը ներկայացրեց արդյունքները. «2015-ին ցուցանիշը եղել է -21, 2016-ին՝ -19, 2017-ին փոքր ինչ դրական տեղաշարժ կա՝ -17: 2019-ին ցուցանիշը կտրուկ փոխվել է՝ դառնալով 43.1: Այսինքն՝ այլևս չէր ընկալվում, որ ոստիկանությունը՝ որպես ճնշման միջոց է օգտագործվում, բայց 2021-ին ցուցանիշը իջել է 21.8. կրկնակի նվազել է: Արտակարգ դրության, ռազմական դրության ռեժիմը և դրան ուղեկցած հանրային միջոցառումներն ազդեցություն են գործել հանրային ընկալումների վրա: Այո, ցուցանիշը գտնվում է դրական տիրույթում, բայց այն, որ դա կրկնակի նվազել է, պետք է մտահոգի իշխանություններին»:
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
