Արագածոտնի մարզի բնակիչներն ահազանգում են, որ արաբ ներկայացած թուրքերը մեծ թվով հողատարածքներ են ձեռք բերում հատկապես Օհանավանում, Ապարանում, դուք վիճակագրություն ունե՞ք, թե քանի գույք են ձեռք բերել արաբները, ադրբեջանցիները, թուրքերը: Այսօր լրագրողների այս հարցին ի պատասխան Պետգույքի կառավարման կոմիտեի նախագահ Առնակ Ավետիսյանը պատասխանեց. «Եթե այդ գույքը ձեռք են բերում երկրորդային շուկայից, մասնավոր անձանցից որոշակի հողատարածքներ, ես գիտեմ, տեղեկացված եմ, որ ՀՀ-ում ոչ ռեզիդենտներին հողեր չեն վաճառում, արգելում է օրենքը: ՀՀ-ում հողատարածքի սեփականություն կարող են ունենալ միայն ՀՀ քաղաքացիները: Իսկ պետական գույքի առումով նմանատիպ դեպքեր բացակայում են, չկան»:
Ինչ վերաբերում է անշարժ գույքի օտարմանը, նա վստահեցրեց, որ պետական գույք նույնպես նրանց չի օտարվել:
Թե ինչպես վաճառվեց նախկին վարչապետ Հովիկ Աբրահամյանի առանձնատունը Մոնումենտում, ինչպես ստացվեց, որ հենց այն նույն գնորդը, որը «Գոլդեն Փելեսն» էր գնել, այդ առանձնատունը նա գնեց, այս հարցերին ի պատասխան՝ Առնակ Ավետիսյանն ասաց, որ կառավարությունը մրցույթ էր հայտարարել, մրցույթին մասնակցել էր հենց այդ մեկ կազմակերպությունը ու տվյալ կազմակերպությունն էլ ներկայացրել էր համապատասխան գնային առաջարկ ու ներդրումային ծրագիր. «Արդյունքում հաղթող ճանաչվեց այդ մեկ կազմակերպությունը: Չկար երկրորդ մասնակից, ու չկար ավելի լավ առաջարկ, հետեւաբար գնորդ ճանաչվեց միակ ներկայացված առաջարկը»:
Կարդացեք նաև
Հռիփսիմե ՋԵԲԵՋՅԱՆ
