ԱԺ պետաիրավական հարցերի հանձնաժողովն այսօր դրական եզրակացություն տվեց ՔՊ-ի եւ կառավարության միասնական հեղինակած՝ «Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքում փոփոխություններ եւ լրացումներ կատարելու մասին օրենքի նախագծին, որով, հիշեցնենք, կսահմանվեն դատավորների, դատախազների ու քննչական մարմիններում ինքնավար պաշտոն զբաղեցրած անձանց կենսաթոշակային ապահովության միասնական պայմանները։ Նախագիծն առաջիկայում կքննարկվի ԱԺ լիագումար նիստերի օրակարգում։
Նշենք, որ քննարկման ավարտին եզրափակիչ ելույթում հանձնաժողովի նախագահ, «Քաղաքացիական պայմանագիր» խմբակցության պատգամավոր Վլադիմիր Վարդանյանը հիշատակեց այն փաստը, որ խորհրդարանական ընդդիմությունը հրաժարվել է մասնակցել սահմանադրական բարեփոխումների գործընթացին։ «Երեկ Կարեն Անդրեասյանը հնարավորություն ունեցավ անդրադառնալու այն հանգամանքին, որ ընդդիմադիր գործընկերները, ցավոք, չեն մասնակցում սահմանադրական բարեփոխումների խորհրդի նիստին։ Եթե ձեր որոշումը փոխեք եւ առավել ակտիվ մասնակցեք, հավատացնում եմ՝ այս հարցի վերաբերյալ առնվազն դաշնակից կունենաք սահմանադրական բարեփոխումների խորհրդում»,-նշեց Վլադիմիր Վարդանյանը։
Լուիզա ՍՈՒՔԻԱՍՅԱՆ
