«Ես ցավում եմ, որ մենք այսօր ստիպված ենք հեռացնել Եվրոպայի խորհրդի անդամ մի երկրի, որն ավելի քան 25 տարի մեր ընտանիքի կազմում է»,- քիչ առաջ Եվրոպայի խորհրդի խորհրդարանական վեհաժողովի (ԵԽԽՎ) արտահերթ նստաշրջանի լիագումար նիստի ավարտին հայտարարեց ԵԽԽՎ նախագահ Թինի Կոքսը:
Ավարտվեց «Ուկրաինայի դեմ Ռուսաստանի Դաշնության ագրեսիայի հետևանքները» թեմայով հրատապ քննարկումը, և Վեհաժողովը 216 «կողմ», 0 «դեմ», 3 «ձեռնպահ» ձայների հարաբերակցությամբ ընդունեց միասնական կարծիք, որով դիմելու է ԵԽ Նախարարների կոմիտեին, որպեսզի նա նախաձեռնի ՌԴ-ին ԵԽ-ից հեռացնելու գործընթաց:
ԵԽԽՎ պատգամավորները ծափահարություններով ընդունեցին քվեարկության արդյունքները:
Թինի Կոքսը, եզրափակելով արտահերթ նստաշրջանն ասաց. «Վեհաժողովն այս օրերին վերածվել էր ոչ թե արենայի, որտեղ բանավիճում են, այլ ագորայի, որտեղ բոլորը միակարծիք են: Ես տխրում եմ, որ մենք ստիպված ենք Նախարարների կոմիտեին դիմել հեռացնելու պահանջով մի անդամ պետության, որն ավելի քան 25 տարի անդամակցում է մեր կազմակերպությանը: Եթե կարմիր գծերը հատում եք, ուրեմն այստեղ տեղ չունեք: Վաղը ես կդիմեմ Նախարարների կոմիտեին և մեր միասնական կարծիքի մասին կհայտնեմ»:
Կարդացեք նաև
ԵԽԽՎ կայքի տեղեկատվության համաձայն՝ հայկական պատվիրակության անդամները չեն մասնակցել քվեարկությանը:
Տաթև ՀԱՐՈՒԹՅՈՒՆՅԱՆ
