Եվրոպայի խորհրդի խորհրդարանական վեհաժողովի (ԵԽԽՎ) արտահերթ նստաշրջանի՝ մարտի 15-ի լիագումար նիստի ընթացքում ողջ օրը ԵԽԽՎ-ում հնչեցին հակառուսական ելույթներ՝ քննադատելով Ռուսաստանին՝ մասնավորապես Պուտինին Ուկրաինայի դեմ պատերազմ սկսելու համար:
Այժմ էլ այդ ելույթները շարունակվում են. ԵԽԽՎ-ում անցկացվում է «Ուկրաինայի դեմ Ռուսաստանի Դաշնության ագրեսիայի հետևանքները» թեմայով հրատապ ընթացակարգով քննարկում: Այն կավարտվի Երևանի ժամանակով ժամը 23.30-ին: Այս քննարկման արդյունքում քվեարկության կդրվի նորվեգացի պատվիրակ Ինյերդ Շոուի համանուն զեկույցը:
Փաստաթղթի եզրափակիչ հատվածում ամրագրված է. «Եվրոպական ընտանիքում ագրեսորի համար տեղ չկա: Նախարարների կոմիտեն պետք է պահանջի Ռուսաստանի Դաշնությանը դուրս գալ Եվրոպայի խորհրդից։ Եթե Ռուսաստանի Դաշնությունը չկատարի պահանջը, Նախարարների կոմիտեն պետք է նախատեսի այն ժամկետը, որից հետո անհապաղ Ռուսաստանի Դաշնությունը կդադարի լինել Եվրոպայի խորհրդի անդամ»:
Կարդացեք նաև
Տեղեկացնենք՝ ԵԽ Նախարարների կոմիտեն որոշում է կայացրել ԵԽԽՎ-ում ռուսական պատվիրակության աշխատանքները դադարեցնելու մասին:
ԵԽ գլխավոր քարտուղար Մարիա Պեյչինովիչ Բուրիչը հայտարարել էր՝ Նախարարների կոմիտեի որոշումից հետո ԵԽԽՎ-ն պետք է որոշի՝ արդյոք թողնում է Նախարարների կոմիտեի որոշումն ուժի մեջ, և ԵԽԽՎ-ում ռուսական պատվիրակության աշխատանքները շարունակում են մնալ դադարեցվա՞ծ, թե՞ որոշում է կայացնում ընդհանրապես Ռուսաստանին ԵԽ-ից դուրս հանելու մասին:
Վեհաժողովում ելույթ ունեցող պատվիրակները հիմնականում միակարծիք են՝ ՌԴ-ին պետք է «դուրս շպրտել» Եվրոպայի խորհրդից:
Ուկրաինայի վարչապետ Դենիս Շմիհալն իր առցանց ելույթում կոչ էր արել Վեհաժողովին անհապաղ Ռուսաստանին դուրս հանել Եվրոպայի խորհրդից:
Իտալացի պատվիրակ Պերո Ֆասսինոն, թեև սուր քննադատության ենթարկեց Ռուսաստանին իր բնութագրմամբ Ուկրաինա ներխուժելու համար, սակայն մյուս կողմից էլ կարևորեց. «Պետք է երաշխավորենք ՌԴ քաղաքացիների իրավունքների պաշտպանությունը և ճանապարհներ գտնենք ՌԴ քաղհասարակության հետ համագործակցության համար»:
Իռլանդացի պատվիրակ Ջոզեֆ Օրելլին հայտարարեց. «Ռուսաստանը ո′չ բարոյական, ո′չ իրավական և ո′չ քաղաքական իրավունք այլևս չունի լինել այս կառույցի անդամ»:
Գերմանիայի պատվիրակ Անդրեյ Հունկոն շեշտեց՝ պետք է չանտեսել ռուս հասարակության այն հատվածին, որոնք դեմ են պատերազմին:
Մեծ Բրիտանիան ներկայացնող պատվիրակ Ջոն Հովելն ասաց. «Միանշանակ է, որ Ռուսաստանին պետք է դուրս հանել մեր կազմակերպությունից: Մենք փորձել եք կամուրջներ կառուցել ՌԴ-ի հետ, բայց չի ստացվել»:
Նա փաստեց՝ պատժամիջոցների՝ ներկայացված փաթեթն ամենամեծն է, որը երբևէ Եվրոպայի խորհուրդը պատրաստել է:
Գերմանացի պատվիրակ Ֆիլիզ Փոլատը հայտարարեց՝ իհարկե, պետք է Ռուսաստանը իզոլացվի, սակայն չպետք է մոռանան Ռուսաստանի քաղաքացիների իրավունքների պաշտպանության մասին:
Հույն պատվիրակ Թեոդորա Բակոյանիսը խստորեն դատապարտեց ՌԴ-ին ու վստահեցրեց՝ ՌԴ-ի ոտնձգությունները Ուկրաինայի տարածքային ամբողջականության դեմ ներում ու արդարացում չունեն:
Ուկրաինայի պատվիրակության 9 կին անդամներ մասնակցում են արտահերթ նստաշրջանին: Լարիսա Բիլոզիրը ԵԽԽՎ դահլիճում է իր երկու մանկահասակ դուստրերի հետ: Նա հուզիչ ելույթ ունեցավ, թե իր երեխաները զրկված են տնից, դպրոց գնալու իրավունքից, անվտանգությունից: Բոլոր պատվիրակները ծափահարեցին նրան:
Ուկրաինացի մյուս կին պատգամավորը՝ Յելիզավետա Յասկոն հայտարարեց՝ ինքը ՌԴ-ի պատճառով կորցրել է իր սիրելիին՝ Միխեիլ Սաակաշվիլիին, քանի որ նրա քաղաքացիական կինն է, կորցրել է իր երկրի անվտանգությունը՝ կրկին Պուտինի պատճառով: Նա ասաց, թե հավատում է, որ ԵԽԽՎ-ում իրենց աջակցում են, բայց նկատեց՝ պետք է մասին գործել և մտածել՝ ինչպես կարելի է կառուցել ուժեղ անվտանգային համակարգ: Նա առաջարկեց Ուկրաինայի նախագահ Վլադիմիր Զելենսկիին արժանացնել Նոբելյան մրցանակի:
Ուկրաինական պատվիրակության անդամ Ալեքսեյ Գոնչարենկոն էլ տեսակապի միջոցով իր ուղերձը հղեց մարտի դաշտից: Նա վստահեցրեց՝ միասին պետք է պայքարեն ՌԴ-ի դեմ, քանի որ սա ոչ թե ռուս-ուկրաինական պատերազմն է, այլ համաշխարհային: Նա հորդորեց իրենց զենք տրամադրել, ինքնաթիռներ և փակել Ուկրաինայի օդը:
ԵԽԽՎ պատվիրակներից շատերն ասում էին, թե սա Պուտինի ու նրա օլիգարխների պատերազմն է, Պուտինն իր դեմքն է ցույց տալիս: Արտահերթ լիագումար նիստի ավարտին ԵԽԽՎ-ն կարծիք կընդունի, որը կուղղվի Նախարարների կոմիտեին։
Տաթև ՀԱՐՈՒԹՅՈՒՆՅԱՆ
