«ՀՀ-ի և Ադրբեջանի Հանրապետության միջև խաղաղության պայմանագրի կնքման նպատակով ՀՀ ԱԳՆ կողմից ԵԱՀԿ ՄԽ համանախագահությանը հղված դիմումը, կարծում եմ, ենթադրում է նոր գործընթաց: Հարկ է նշել, որ համանախագահությունն իր հայտարարություններում ՀՀ-ի և Ադրբեջանի հարաբերությունների կարգավորմանը, դեմարկացիայի ու դելիմիտացիայի հարցերին իր աջակցությունը հայտնել էր»,-Aravot.am-ի հետ զրույցում ասաց ԱՀ նախագահի միջազգային հարաբերությունների հարցերով խորհրդական Նելլի Բաղդասարյանը՝ պատասխանելով հարցին՝ Արցախում ինչպե՞ս են վերաբերվում ՀՀ-ի եւ Ադրբեջանի հարաբերությունները կարգավորելու համար մեկնարկած գործընթացին:
«Քանի դեռ այս հարցի հետ կապված նոր գործընթացի մեկնարկ է տրվել, առայժմ հակված ենք մեկնաբանություններ անել ԵԱՀԿ Մինսկի խմբի համանախագահության ադրբեջանա-ղարաբաղյան հակամարտության կարգավորման հաստատված մանդատի և տասնամյակներ տևած գործընթացի շուրջ, որը ցայսօր չեղարկված չէ: 2020 թ. նոյեմբերի 10-ի Եռակողմ պայմանավորվածությունից հետո համանախագահող երկրների կողմից բազմիցս շեշտվել է, որ հակամարտությունը լուծված չէ, իսկ ԵԱՀԿ Մինսկի խմբի համանախագահության 2021 թ. ապրիլի 13-ի հայտարարության մեջ նշվում էր, «որ հատուկ ուշադրություն պետք է դարձվի վերջնական համապարփակ և կայուն կարգավորման հասնելուն՝ կողմերին հայտնի տարրերի և սկզբունքների հիման վրա»։ Այն չեղարկող որևէ հայտարարություն ցայսօր չի եղել»,- ասաց մեր զրուցակիցը՝ հավելելով, որ 2022 թ. հունվարի 14-ին, ՌԴ արտաքին գործերի նախարար Սերգեյ Լավրովի կողմից տրված մեկնաբանության մեջ ասվում էր, որ «Հայաստանի եւ Ադրբեջանի միջև սահմանի սահմանազատման հարցը չի վերաբերում Ղարաբաղյան տարածաշրջանին և կարգավորման հարցերին, դա զուտ երկկողմ հարց է»:
Մեր զրուցակիցն ընդգծում է՝ «ԵԱՀԿ Մինսկի խմբի համանախագահության շրջանակում ԼՂ հակամարտության համապարփակ կարգավորման անհրաժեշտությունը» կրկին հաստատել է Ֆրանսիայի նախագահ Էմանուել Մակրոնը:
«Չենք կարող բացառել, որ ուկրաինական ճգնաժամը կարող է որոշակի խմբագրումներ կատարել ինչպես աշխարհաքաղաքական այնպես էլ տարածաշրջանային հարցերում, բայց այս պահին հենվելով փաստերի վրա, պետք է նշենք, որ ԵԱՀԿ Մինսկի խմբի համանախագահության կողմից հակամարտության կարգավորման հարցում որևէ գործընթաց կամ հայտարարություն չի չեղարկվել և չի հերքվել:
Կարդացեք նաև
Որևէ այլ գործընթաց, վերոնշյալ փաստերին հակասող տրամաբանությամբ լուծում, որը կարող է դուրս լինել Արցախի Հանրապետության ժողովրդի ինքնորոշման իրավունքի իրացման տրամաբանությունից, անկասկած տանելու է Ադրբեջանի կողմից Արցախի Հանրապետության բնակչության էթնիկական զտմանը և բնաջնջմանը», ասաց մեր զրուցակիցը:
Նելլի ԳՐԻԳՈՐՅԱՆ
